Milan Vukadinoviq largohet nga Demokratët

Milan Vukadinoviq, ish-kryetar i Bordit të Drejtorëve të ndërmarrjes komunale “Çistoća” të Podgoricës dhe ish-drejtor në detyrë i Drejtoratit për Ekologji në Ministrinë e Ekologjisë, Zhvillimit të Qëndrueshëm dhe Zhvillimit të Veriut, njoftoi të dielën se është larguar nga anëtarësia e Malit të Zi Demokratik (Demokratët). Siç njofton RTCG, Vukadinoviq tha se vendimin e ka marrë pas një reflektimi personal dhe në përputhje me bindjet e tij.

“Largimin tim dua ta mbyll në mënyrë korrekte dhe me dinjitet, pa polemika dhe pa vërejtje personale. Vendimi im nuk e ndryshon respektin ndaj njerëzve me të cilët kam bashkëpunuar, as ndaj miqësive që kam ndërtuar gjatë asaj periudhe”, deklaroi Vukadinoviq në njoftimin dërguar medieve, ku bëri të ditur se sot ka paraqitur zyrtarisht dorëheqjen nga anëtarësia në Këshillin Komunal të Demokratëve në Podgoricë.

Ai shtoi se vendimin e tij në këtë moment nuk dëshiron ta komentojë më tej politikisht, as ta lidhë me procese të tjera politike. “Çdokush ka të drejtë të veprojë në përputhje me bindjet e veta dhe të marrë vendime për të cilat mban përgjegjësi personale”, theksoi Vukadinoviq, duke falënderuar bashkëpunëtorët për përvojën dhe punën e përbashkët dhe duke u uruar suksese në vazhdim.