Mima: Aksioni policor nuk e zgjidh problemin e energjisë
Partia Demokratike është në favor të ligjshmërisë dhe që ligji të funksionojë në mënyrë të barabartë për këdo që vjedh energjinë.
Deputeti i Partisë Demokratike, Florian Mima gjatë një deklaratë për mediat të hënën, u shpreh në favor të ligjit por akuzon qeverinë për dëmin që i ka shkaktuar sistemit energjitik dhe qytetarëve me rritjen e faturës financiare.
“2 milionë e 100 mijë shqiptarë, që janë pjesa më e madhe e popullsisë, në këtë kohëra krize, varfërie e papunësie, do të paguajnë më shumë çdo muaj pas vendimit që ka marrë Edi Rama. Aksioni Policor që ka nisur sot, me siguri do të krijojë terror tek qytetarët, por nuk do të zgjidhë problemin, pasi paligjshmëria nis dhe mbaron me qeverinë”, tha Mima.
Po ashtu, Mima u shprehur se “Abuzuesit më të mëdhenj të energjisë elektrike janë menaxherët e qeverisë, shpesh me të kaluar kriminale, dhe që marrin para në dorë për favoret që bëjnë me pasurinë publike. Dëmin më të madh sistemit ia shkaktoi Edi Rama, duke i falur CEZ-it 95 milionë euro, para që ai do ti nxjerrë nga xhepat e varfër të qytetarëve shqiptarë”.
“Qytetarëve të vendit sot nuk u intereson retorika e propaganda me regji qendrore. Qytetarët duan të dinë, pse pjesa më e madhe e tyre, ata që janë sot në pamundësi ekonomike, do të paguajnë deri në 70% më shumë çdo muaj për energjinë elektrike. Duan të dinë pse kryeministri, pa transparencë dhe për interesat e tij personale, futi dorën në xhepat e tyre për të nxjerrë 95 milionë euro për CEZ, ndërkohë që duhej t’i kërkonte kësaj kompanie 3 miliardë dollarë dëmshpërblim”, pohoi Mima.
“Partia Demokratike dënon fushatën e shantazhit të Edi Ramës dhe kërkon transparencë dhe llogaridhënie për abuzimet që ai vetë ka bërë e po bën me enenergjinë elektrike” është shprehur Mima.
