Ministria e Bujqësisë, përgatit hartën e prodhimeve bujqësore

Ekspertë të ministrisë së Bujqësisë dhe Universitetit  Bujqësor Tiranë, po punojnë për përgatitjen e hartës kombëtare të prodhimeve bujqësore.

Burime nga dikasteri i Bujqësisë, bënë të ditur se, harta e prodhimeve bujqësore pritet të publikohet brenda muajit tetor dhe do të shërbejë si bazë për skemat mbështetëse bujqësore.

Sipas këtij dikasteri, skemat e ardhshme nuk do të jenë skema të përgjithshme, por do të jenë skema të fokusuara në prodhime të veçanta. P.sh., pas përfundimit të hartës së prodhimeve bujqësore, Ministria do të ketë të qartë se cilat janë prioritetet e bujqësisë në zona të veçanta. P.sh. në zonën e Malësisë së Madhe, prioritet do të jenë bimët mjekësore, bimët aromatike, gështenja. Në Qarkun e Korçës, prioritet do të jetë fasulja pllaqi, molla, patatja dhe ne pikërisht këto do të financojmë në këto zona. Në zonën e Vlorës, Sarandës, Beratit, ministria planifikon të mbështesë bagëtinë e imët dhe ullirin, duke u nisur edhe nga kushtet specifike klimatike në këto zona.

Ekspertët e fushës shpjegojnë se harta bujqësore do të plotësojë kuadrin e masave për formalizimin e sektorit të bujqësisë, ndërsa do të shërbejë për të orjentuar prodhimin bujqësore drejt këkesave të tregut dhe konsumatorëve duke evituar fenomentin e prodhimit të përqëndruar për produkte të veçanta.