Ministria e Financave: Punonjësit marrin raport, përfshihen në fushatë

Ministrja e Financave denoncon se shumë punonjës të administratës fiskale në tatime dhe dogana po përdorin mjete alternative për të marrë pjesë në fushatën elektorale në mënyrë të paligjshme. Ministria e drejtuar nga Helga Vukaj, e propozuar nga Partia Demokratike thotë se shumë persona marrin raporte mjekësore të gjata për të justifikuar mungesën e tyre në punë, për të pasur kohë për të shkuar në fushatën elektorale të partive politike.

“Në bazë të informacioneve të marra, rezulton se punonjës të administratës fiskale, në tatime dhe dogana, po përdorin si mjet justifikues raporte mjekësore afatgjata, me qëllim shkëputjen nga puna për tu angazhuar në fushatë elektorale. Veprime të tilla janë të papranueshme dhe të dënueshme ligjërisht”, thotë në njoftim ministria e Financave.

Më tej u bëhet thirrje qytetarëve si dhe subjekteve tregtare që ti denoncojnë këto raste dhe garanton marrjen e masave të menjëhershme ndaj këtyre punonjësve, duke shkruar apo dërguar foto dhe filmime në numrin 0676054545. (Whatsapp, Viber).