Ministria e Shëndetësisë reagon për vdekjen e 37-vjeçares shtatzënë: Nëse ka parregullsi, do të merren masa

Ministria e Shëndetësisë dhe Mirëqenies Sociale ka reaguar lidhur me humbjen e jetës së 37-vjeçares shtatzënë nga Pogradeci, Marjana Karolina Bunaj.

Ajo humbi jetën teksa po transportohej drejt Tiranës për ndihmë të specializuar mjekësore, ndërsa përmes një reagimi zyrtar, ministria shpreh keqardhje për ngjarjen dhe thotë se po ndiqen dhe verifikohen të gjithë hapat që lidhen me trajtimin dhe menaxhimin e këtij rasti tragjik.

Ministria thekson se çdo gjetje do të analizohet me seriozitetin maksimal dhe, nëse evidentohen parregullsi apo mangësi, do të merren të gjitha masat e nevojshme, në përputhje me ligjin dhe standardet profesionale.

Reagimi i plotë

“Ministria e Shëndetësisë dhe Mirëqenies Sociale shpreh keqardhjen e thellë për humbjen e jetës së pacientes M.K. dhe i përcjell familjes dhe të afërmve ngushëllimet më të sinqerta. Në respekt të familjes dhe në këtë moment të dhimbshëm, MSHMS po ndjek me përgjegjshmëri të plotë të gjitha hapat që lidhen me trajtimin dhe menaxhimin e këtij rasti. Ministria ka kërkuar kryerjen e një vlerësimi të plotë dhe të pavarur të menaxhimit të rastit, me qëllim vlerësimin profesional dhe të paanshëm të të gjithë procesit të kujdesit shëndetësor, nga paraqitja e pacientes deri në përfundimin e trajtimit. Angazhimi ynë është i plotë për të garantuar transparencë dhe përgjegjshmëri. Çdo gjetje mbi vlerësimin e menaxhimit të rastit do të analizohet me seriozitetin maksimal dhe, nëse evidentohen parregullsi apo mangësi në ndjekjen e rastit, do të merren të gjitha masat e nevojshme, në përputhje me ligjin dhe standardet profesionale. Siguria e nënës dhe garantimi i kujdesit obstetrikal në kohë, me cilësi dhe në përputhje me standardet e përcaktuara, janë përgjegjësi të panegociueshme të sistemit shëndetësor”, thuhet në reagimin e ministrisë.