Miratimi i rezolutës së integrimit, reagon politika

Pas miratimit të rezolutës për integrimin në Bashkimin Europian, që mori 104 vota pro, kanë reaguar edhe politikanët.

Ministri i Jashtëm Ferit Hoxha me anë të një postimi në X shprehet se miratimi i kësaj rezolute përbën moment me rëndësi të veçantë politike dhe kombëtare.

Hoxha deklaron se integrimi në BE mbetet një prioritet absolut kombëtar, duke shtuar se duhet të na bashkojë, pavarësisht dallimeve në bindjet politike.

“Miratimi (me thuajse unanimitet – vetëm një abstenim) i #rezolutës në mbështetje të anëtarësimit të Shqipërisë në #BashkiminEvropian përbën një moment me rëndësi të veçantë politike dhe #kombëtare.

Ai është një shenjë e qartë e #pjekurisë politike dhe demokratike, një konfirmim i rrugës së drejtë që #Shqipëria ka zgjedhur dhe po ndjek, si edhe një tregues domethënës i mbështetjes së gjerë dhe të qëndrueshme që gëzon #rrugëtimi evropian i vendit në të gjitha nivelet e shoqërisë dhe politikës.

Anëtarësimi në Bashkimin Evropian mbetet një objektiv strategjik kombëtar që na bashkon përtej #dallimeve politike, në funksion të ndërtimit të një të ardhmeje të përbashkët #evropiane për vendin dhe qytetarët tanë”, shkruan Hoxha.

Edhe presidenti i Republikës Bajram Begaj ka përshëndetur miratimin e projekt-rezulotës për integrimin.

“Rezoluta e Kuvendit të Shqipërisë për procesin e anëtarësimit në BE është përgjigjja e duhur ndaj Raportit të Progresit të Komisionit Evropian për Shqipërinë 2025 dhe ndaj Raportit të Komisionit për Punët e Jashtme të Parlamentit Evropian.

Kjo rezolutë shënon qasjen e vetme të drejtë: qasjen e bashkëpunimit, kompromisit dhe konsensusit për arritjen e këtij objektivi strategjik kombëtar.

Ajo është dëshmi e pakundërshtueshme e një politike serioze dhe të përgjegjshme, të fokusuar plotësisht në agjendën reformuese të vendit për transformimin demokratik, institucional, ekonomik dhe social.

Përshëndes këtë akt të çmuar të bashkëpunimit parlamentar”, shkruan Begaj.

Me 104 vota pro, Kuvendi miratoi sot në 14 maj rezolutën për integrimin e Shqipërisë në Bashkimin Europian, pas paktit mes PS-së dhe PD-së.

/tvklan.al