MOLDAVI – Sandu emëron Eugeniu Osmochescu kryeministër të përkohshëm

KISHINEV, 7 korrik /ATSh/- Presidentja e Moldavisë, Maia Sandu, emëroi sot zëvendëskryeministrin Eugeniu Osmochescu si kryeministër të përkohshëm, duke zëvendësuar Alexandru Munteanu, i cili dha dorëheqjen papritur të premten, raportoi “Reuters”.

Munteanu deklaroi më herët, se nuk mund ta ushtronte më detyrën në përputhje me bindjet e tij.

Osmochescu, i cili aktualisht mban edhe postin e ministrit të Zhvillimit Ekonomik dhe Digjitalizimit, do të marrë detyrën nesër, sipas dekretit të presidentes Sandu.

Përpara se t’i bashkohej qeverisë, ai ka punuar në Korporatën Ndërkombëtare Financiare, degën e sektorit privat të Bankës Botërore.

“Do të doja ta falënderoja për pranimin e kësaj përgjegjësie dhe t’i uroj suksese në këtë mision”, shkroi Munteanu në një postim në Facebook.

Sandu deklaroi të premten se gjatë kësaj jave do të zhvillonte konsultime me grupet parlamentare, për të emëruar pasuesin e Munteanu.

Partia pro-evropiane në pushtet, Partia e Veprimit dhe Solidaritetit (PAS), gëzon shumicën në parlamentin me 101 vende.

Munteanu ishte emëruar në detyrë pas zgjedhjeve parlamentare të shtatorit, ku PAS mposhti bindshëm rivalin e saj me prirje pro-ruse dhe siguroi një mandat të ri qeverisës.

Osmochescu do të drejtojë nesër mbledhjen e qeverisë, e cila do të vazhdojë të ushtrojë detyrën, në kapacitet të përkohshëm derisa parlamenti të miratojë një qeveri të re. /