Muça: Spiropali, katalizator mes sheshit dhe pushtetit

Analisti Flogert Muça deklaroi në emisionin “3D” të Alban Dudushit në RTSH1, se deputetja Elisa Spiropali po luan rolin e një katalizatori midis sheshit protestues dhe pushtetit, duke vlerësuar guximin e saj për të ngritur publikisht disa çështje, por edhe rreziqet që mbart kjo nismë.

Muça, duke folur për marrëdhënien midis Spiropalit dhe kryeministrit Edi Rama, theksoi se kjo lëvizje vjen në një moment kur Rama ka nevojë për një figurë të tillë brenda partisë.

“Nevoja e Ramës sot është për një lloj katalizatori, ndërmjetësi midis sheshit dhe pushtetit, tavolinës së pushtetit, qeverisë, mazhorancës. Dhe në këtë kuptim nuk ka nevojë të flasë Spiropali fare me Ramën”, tha ai.

Muça u ndal edhe te protesta aktuale, duke theksuar se ajo ka humbur dinamikën fillestare intelektuale dhe është kapur nga aktorë politikë.

“Brenda sheshit nuk o profesor, nuk ka aty njerëzit që kanë nivel intelektual për të dalë dhe për të artikuluar, që të bëjnë doktrina…”, nënvizoi analisti.

Duke komentuar iniciativën e Spiropalit, Muça u shpreh se ajo e njeh mirë Ramën dhe di çfarë ai kërkon.

“Pra Spiropali e di çfarë do Rama dhe po e bën lëvizjen që nesër kur Rama të bëjë atë gjë e vetë, të jetë aty. Dhe nga ana tjetër Rama e dhe Elisa… e ka thënë një moment që në qoftë se ka një gjë që Elisa nuk do e bëjë kurrë është të tradhtojë Partinë Socialiste dhe Edi Ramën”, shpjegoi Muça.

Ai shtoi se një nga pikat e forta të Edi Ramës është komunikimi dhe menaxhimi i situatave të tilla.

“Një nga mangësitë që Rama nuk e ka… është që është mjeshtër komunikimi. Dhe Rama përherë e ka luajtur dhe ka dalë lajmi që përplaset me Spiropalin, fërkohet me Spiropalin… E njeh sot Elisa Edi Ramën. Elisa Edi Ramën e njeh ka 25 vjet”, deklaroi Muça.