Mucunski takon në Nju Jork të dërguarën britanike Karen Pierce: në fokus siguria dhe integrimi europian i Ballkanit Perëndimor

Ministri i Punëve të Jashtme dhe Tregtisë së Jashtme të Maqedonisë së Veriut, Timço Mucunski, u takua pasditen e së enjtes në Nju Jork me të dërguarën speciale të Mbretërisë së Bashkuar për Ballkanin Perëndimor, Karen Pierce. Takimi u zhvillua në margjinat e sesionit të Asamblesë së Përgjithshme të Organizatës së Kombeve të Bashkuara.

Në qendër të bisedimeve ishin stabiliteti dhe siguria rajonale, si dhe perspektiva europiane e vendeve të Ballkanit Perëndimor. Bashkëbiseduesit shkëmbyen pikëpamje mbi sfidat aktuale rajonale dhe u morën vesh për thellimin e mëtejshëm të marrëdhënieve dypalëshe në kuadër të partneritetit strategjik mes Shkupit dhe Londrës.

Theksi i takimit u vu te proceset reformuese, forcimi i institucioneve demokratike dhe sundimi i ligjit, si dhe aleanca në NATO dhe kontributi i përbashkët për sigurinë europiane dhe euroatlantike.

Një vëmendje e veçantë iu kushtua bashkëpunimit ekonomik, projekteve konkrete përmes partneritetit “qeveri me qeveri” dhe nismave të Procesit të Berlinit, të cilat synojnë më shumë lidhshmëri rajonale dhe zhvillim ekonomik.

Burimi: Makfax