Mustafa: Thaçi do të jetë president

Kryeministri i Kosovës, Isa Mustafa, deklaroi të hënën se “LDK do të respektojë marrëveshjen e bërë me PDK-në, si rrjedhojë Hashim Thaçi do të jetë president i vendit”.

Gjatë përurimit të segmentit të rrugës nacionale N2, Prishtinë- Mitrovicë, Mustafa foli edhe për çështjen e liberalizimit të vizave, si dhe për gjendjen aktuale politike.

Kreu i qeevrisë theksoi se “Kosova i ka përmbushur të gjithë kriteret për liberalizimin e vizave dhe se janë duke u takuar me të gjitha institucionet përgjegjëse për të parë edhe njëherë nëse ndonjë pjesë e rekomandimeve të BE-së ka mbetur pa u përmbushur”.

“Të gjitha kriteret janë përmbushur, por ka pjesë të rekomandimeve të papërmbushura , pasi BE ka dhënë rekomandime dhe jo kritere”, u shpreh Mustafa.

Duke folur për akuzat e opozitës se prej kur PDK dhe LDK kanë marrë qeverisjen e vendit është rritur krimi dhe korrupsioni, Mustafa tha se ato janë të pabaza.
“Deri tani nuk ka as një rast të korrupsionit në ndonjë ministri”, tha Mustafa.