Ndahet nga jeta në moshën 97-vjeçare artistja japoneze Yayoi Kusama

TOKIO, 27 gusht, ATSH/ Artistja e njohur japoneze Yayoi Kusama, një prej figurave më të rëndësishme të artit avangardë bashkëkohor, është ndarë nga jeta në moshën 97-vjeçare.

Kusama ndërroi jetë më 14 gusht në një spital në Tokio, ndërsa lajmi u bë publik më 27 gusht nga Muzeu Yayoi Kusama dhe fondacioni që mban emrin e saj. Në njoftimin zyrtar thuhet se artistja vazhdoi të pikturonte deri në ditët e fundit të jetës.

E lindur më 22 mars 1929 në Matsumoto të Japonisë, Kusama nisi të merrej me art që në fëmijëri, ndërsa përvojat e saj me halucinacionet vizuale dhe dëgjimore u shndërruan më vonë në një prej elementeve përcaktuese të krijimtarisë së saj. Pikat, rrjetat dhe modelet e përsëritura u bënë shenja dalluese të veprave të saj.

Në vitin 1957 ajo u zhvendos në Shtetet e Bashkuara dhe u vendos në Nju Jork, ku u përfshi në skenën avangardë të viteve ’60. Seria e saj “Infinity Nets” tërhoqi vëmendjen e artistëve dhe kritikëve, ndërsa Kusama nisi të eksperimentonte edhe me skulpturën, instalacionet dhe performancat.

Gjatë viteve ’60, ajo u bë e njohur edhe për performancat e saj provokuese, të lidhura me seksualitetin, luftën dhe politikën gjinore. Pavarësisht marrëdhënieve me figura të rëndësishme të artit amerikan, përfshirë Andy Warhol dhe Donald Judd, Kusama e konsideronte veten një artiste të margjinalizuar në një botë arti të dominuar nga burrat.

Në vitin 1973 u kthye në Japoni dhe disa vite më vonë u vendos me dëshirë në një institucion psikiatrik në Tokio. Ajo vazhdoi të krijonte në studion e saj pranë spitalit, duke e shndërruar artin në një mënyrë për të përballuar përvojat e saj personale.

Rikthimi i saj në skenën ndërkombëtare nisi veçanërisht nga fundi i viteve ’80 dhe u forcua gjatë dekadave pasuese. Instalacionet “Infinity Mirror Rooms”, me dhoma të mbuluara me pasqyra, drita dhe pika, u bënë ndër veprat më të njohura dhe më të fotografuara të artit bashkëkohor.

Një tjetër simbol i krijimtarisë së saj u bënë kungujt me pika, veçanërisht skulpturat e verdha dhe të zeza që u shfaqën në instalacione të ndryshme, përfshirë ishullin japonez Naoshima.

Kusama ekspozoi në institucione të mëdha ndërkombëtare, ndërsa veprat e saj u kthyen në një fenomen global që kapërceu kufijtë e botës së artit. Ajo bashkëpunoi edhe me industrinë e modës, përfshirë Louis Vuitton, duke e shndërruar estetikën e saj karakteristike me pika në një imazh të njohur në mbarë botën.

E cilësuar shpesh si “mbretëresha e pikave”, Kusama la pas një karrierë që përfshiu pikturën, skulpturën, instalacionet, performancën, letërsinë dhe poezinë. Muzeu dhe fondacioni i saj deklaruan se do të vazhdojnë të përcjellin dëshirën e artistes për të sjellë shpresë dhe forcë përmes artit.