Ndahet nga jeta Shyqyri Sako, piktori i filmave shqiptarë

Piktori i filmave shqiptarë, Shyqyri Sako u nda nga jeta në moshën 89 vjeçare. Piktor me 50 vite krijimtari. Studioi 3 vjet në Moskë në Institutin e Artit VGIG për piktor filmi, pa mundur t’i përfundojë studimet. Më tej u diplomua në Tiranë dhe në vitin 1963 filloi punë në Kinostudio, ku mori pjesë si piktor i filmit në realizimin e filmit të tij të parë “Detyrë e posaçme” dhe pastaj filmat e tjerë gjer në filmin e fundit “Plumba prej plasteline” në vitin 1997, kur doli në pension.

Blendi Gonxhja ministër i Turizmit, Kulturës dhe Sportit në një mesazh të tij për ndarjen nga jeta të piktorit Shyryi Sako, u shpreh se vepra e tij do të mbetet pjesë e kujtesës sonë kulturore. “Lamtumirë Shyqyri Sako. Një jetë e tërë në shërbim të artit dhe filmit shqiptar, me vepra që do të mbeten pjesë e kujtesës sonë kulturore. I përjetshëm kujtimi dhe trashëgimia që la pas”, shkruan ministri Gonxhja në mesazhin e tij në rrjete sociale.

Përgjatë aktivitetit të tij piktori Shyqyri Sako u nderua dhe me medalion në festivalin e 4-rt të filmit shqiptar për punën e tij me dekoret e rekuizitat në filmin ¨Mësonjëtorja¨. Një ditë më parë AQSHF ndau pamje të ekspozitës së piktorit Shyqyri Sako në vitin 1989 dhe dekorimi në Kinostudio me rastin e 70- vjetorit të Pavarësisë, 1982. Piktori Shyqyri Sako ka krijuar një pjesë të madhe të koleksionit të afishave të filmit, pjesë e trashëgimisë së Arkivit Qëndror Shtetëror të Filmit.