Ndërtimi në Serbi shtrenjtohet me 20 për qind — kontraktorët presin rritje të reja vitin e ardhshëm

Shërbimet e ndërtimit në Serbi janë shtrenjtuar ndjeshëm sivjet: 70 për qind e kontraktorëve ngritën çmimet e shërbimeve të tyre, shumica me 20 për qind, për shkak të shtrenjtimit të materialeve dhe karburanteve — raporton Danas, duke cituar hulumtimin e platformës online të ndërtimit Daibau.rs.

Platforma më e madhe online e ndërtimit në Serbi, siç e përshkruan Danas, kreu gjatë shtatorit një hulumtim mbi lëvizjen e çmimeve në ndërtim, ku morën pjesë disa qindra kontraktorë nga profesione të ndryshme ndërtimi dhe zanatë. Hulumtimi tregon se sivjet 70 për qind e kontraktorëve i ngritën çmimet, shumica me 20 për qind.

Edhe pse kërkesa nuk bie — mbi 50 për qind e të anketuarve thonë se kërkesa sivjet është më e madhe se vitin e kaluar, gati 40 për qind se është e njëjtë dhe më pak se 10 për qind se kanë pasur më pak kërkesa — kontraktorët presin rritje të tjera: plot 78 për qind do t’i ngrenë çmimet me 10 për qind në vitin e ardhshëm, ndonëse thuajse askush nuk pret rritje mbi 30 për qind në këtë periudhë, sipas Danas-it.

Në rritjen e çmimeve ndikojnë më së shumti shtrenjtimi i materialeve dhe i karburanteve, ndërsa inflacioni i përgjithshëm ka pasur ndikim dukshëm më të vogël se këta dy faktorë. Ndër zanatet, 100 për qind e kontraktorëve të konstruksioneve metalike i ngritën çmimet, bashkë me 88 për qind të mjeshtrave të mobilieve e zdrukthtarisë dhe 79 për qind të bojaxhinjve.