Ndikimi i fushatës në ekonomi/ Malaj: Këto janë muaj shpenzimesh. Plani i Investimeve nuk po cenohet

Fushatat elektorale i tregojnë efektet e tyre, pozitive dhe negative, disa muaj pas përfundimit të tyre. Por ky fakt i shprehur shpesh në raportet e Bashkimit Europian nuk ndalon perceptimin paraprak të ekspertëve. Pikërisht për ndikimin e kësaj fushate politike në ekonomi, Rektori i Universitetit “Luarasi”, Arben Malaj, thotë se:

“Besoj që fushatat janë periudha shpenzimesh dhe ekonomia kur ka shpenzime fillon e rritet. Lidhur me sektorin privat, në këto raste në investime ka gjithmonë një tkurrje por në shpenzimet e përgjithshme në ekonomi ka më shumë lëvizje. Impakti që pritet në këto raste është që të mos ndikojë negativisht” tha Malaj. Ndërkohë, pavarësisht se jemi ende në terma perceptimi, Malaj vlerëson mungesën e abuzimeve të qeverisë dhe administratës me buxhetin e shtetit.

“Shpresoj që pjesa e implementimit të buxhetit të mos ketë probleme edhe për shkak të ndërrimeve në ministri. Por thelbësore mbetet që shpenzimet dhe investimet të kryen dhe ekonomia të ushqehet” vijoi Malaj.

Përtej investimeve publike që nuk po abuzohen apo faktit që në ekonomi po shpenzohet para e shtuar, gjithashtu është për tu vlerësuar fryma e deritanishme kundër dhunës, histori e cila gjithmonë ka goditur mbi të gjitha kompanitë private dhe ambientin e të bërit biznes.