Në Itali kishte një “sistem Rocchi”, për ndeshjet Bologna-Inter dhe Inter-Milan arbitrat ishin… “të zgjedhur”

Hetimet për skandalin më të fundit mbi arbitrat në Itali vazhdojnë dhe mendohet se hetimet do të mbyllen jo më parë muajit nëntor duke lënë të kuptohet se penalizimet e mundshme do të prekin sezonin 2026-2027. Nëse Gjykata Sportive në Itali do të konsideronte shkeljet si të dënueshme atëherë skuadrat dhe individët e përfshirë do të mësonin dënimet vetëm në pjesën e dytë të këtij viti.

Nga dëshmitë e para të dhëna prej disa arbitrave është kuptuar se se i ashtuquajturi “sistemi Rocchi” nuk ishte diçka e panjohur për Shoqatën Italiane të Arbitrave (AIA). Caktimi i arbitrave ishte “i pilotuar” ose i “kombinuar” për të favorizuar disa arbitra, të cilët konsideroheshin si të afërt me Rocchi-n. “Miqtë” e tij kishin një privilegj pasi nëse merrnin ndeshje të caktuara do të përfitonin si nga ana profesionale, por dhe ajo financiare. Ndeshjet e mëdha konsideroheshin si një premio për arbitrat “e rrjeshtuar” me Rocchi-n. “Pas një debati të ndezur që kisha me atë, nuk e pashë më Serie A”, ka thënë një dëshmitar në njërën prej dëshmive të publikuara në “La Repubblica”.

Çfarë është sistemi Rocchi? – Trokitjet famëkeqe në dhomën e VAR-it ishin një “privilegj” për gjyqtarët më të afërt me Rocchi-n, në mënyrë që vlerësimet e tyre individuale të ndeshjeve të ishin më të larta dhe kështu të ngjiteshin në renditje. Hetimet kanë treguar se në qendrën kryesore të VAR-it në Itali në Lissone jo të gjitha dhomat ishin të standardeve europiane. Disa prej tyre nuk kishin xham pasi kështu arbitrat pranë Rocchi-t do ta kishin më të lehtë që të komunikonin me të tjerët jashtë.

Çështjet Bologna-Inter dhe Inter-Milan – Sa u përket përcaktimit të arbitrave “La Gazzetta dello Sport” tregon se pas dëshmive të arbitrave konfirmohen akuzat e bëra kundër Rocchi-t për ndeshjet Bologna-Inter dhe Inter-Milan. Nga dëshmitë është konfirmuar fakti se arbitrat e caktuar ishin të pilotuar. Colombo konsiderohej si një arbitër i pëlqyer nga Interi ndërsa Doveri jo. Për hetuesit dëshmitë kanë treguar se arbitrat nuk ishin zgjedhur në bazë të meritokracisë.