Netanyahu zbarkon në Nju Jork për fjalimin në OKB: në agjendë Irani, pa takim me Trump-in

Kryeministri izraelit Benjamin Netanyahu ka zbarkuar të enjten në Nju Jork për të mbajtur fjalimin e tij në Asamblenë e Përgjithshme të OKB-së, në një vizitë të jashtëzakonisht të shkurtër që pritet të zgjasë vetëm disa orë. Zyra e kryeministrit njoftoi se Netanyahu mbërriti në Aeroportin Ndërkombëtar Stewart, në veri të Nju Jorkut, dhe publikoi pamje ku ai dhe bashkëshortja e tij Sara dalin nga avioni qeveritar.

Fjalimi në sesionin e 81-të të Asamblesë së Përgjithshme është caktuar për orën 14:00 me kohën e Nju Jorkut, pra në orën 20:00 me orën e Shqipërisë. Sipas mediave izraelite, fokusi i fjalimit pritet të jetë Irani — Netanyahu ka folur kohët e fundit edhe për rrëzimin e regjimit iranian, duke cituar vlerësime të inteligjencës — si dhe situata në Bregun Perëndimor dhe lufta në Gaza.

Në axhendë nuk figuron asnjë takim me presidentin amerikan Donald Trump. Një zyrtar i lartë amerikan tha se oraret e dy liderëve nuk përputhen, pasi Trump është larguar tashmë nga Nju Jorku. Netanyahu pritet të kthehet në Izrael para perëndimit të diellit të premte, me fillimin e festës së Sukkot — duke e bërë këtë një nga vizitat më të shkurtra të tij në Shtetet e Bashkuara.

Në margjinat e OKB-së, kryeministri izraelit do të zhvillojë takime dypalëshe me presidentët e Argjentinës, Bolivisë, Paraguajit, Panamasë dhe Etiopisë, me zv.presidentin e Kolumbisë dhe me kryeministrat e Greqisë, Sllovenisë dhe Papua Guinesë së Re. Ekipi i tij po diskuton gjithashtu mundësinë e një takimi me sekretarin amerikan të Shtetit Marco Rubio, por asgjë nuk është caktuar ende.

Fjalimi pritet të jetë i tensionuar: Netanyahu ka paralajmëruar se do të sulmojë në podium kryebashkiakun e Nju Jorkut, Zohran Mamdani, i cili e quajti atë “arkitekt të një gjenocidi të tmerrshëm kundër palestinezëve” dhe i kërkoi arrestimin. Protesta pro-palestineze dhe pro-izraelite priten përreth selisë së OKB-së gjatë fjalimit.

Burimet: Al Jazeera, Signal Post, TBS News