Netflix shkurton rreth 1,000 vende pune, shkurtimet më të mëdha që nga viti 2022

Netflix po përgatit shkurtimin e rreth 1,000 vendeve të punës, ose afërsisht 6 për qind të punonjësve të tij, në atë që pritet të jetë raundi më i madh i largimeve nga puna i kompanisë që nga viti 2022, siç njofton Reuters, duke cituar Wall Street Journal.

Lajmi u është bërë i ditur punonjësve të mërkurën në mëngjes me një email të përbashkët të bashkëdrejtorëve ekzekutivë Greg Peters dhe Ted Sarandos. Sipas njoftimit, pjesa më e madhe e shkurtimeve do të prekë ekipet e produktit dhe të teknologjisë, por edhe shërbimet ligjore dhe burimet njerëzore.

Vendimi vjen në një moment kur gjiganti i transmetimit po përballet me konkurrencë gjithnjë e më të fortë për vëmendjen dhe kohën e shikuesve, në një treg mediatik që po konsolidohet me shpejtësi. Kompania humbi së fundmi garën për asetet e Warner Bros Discovery ndaj Paramount Skydance, në një marrëveshje me vlerë rreth 110 miliardë dollarë që u mbyll këtë muaj.

Netflix kishte rreth 16,000 punonjës me kohë të plotë në fund të vitit të kaluar. Kompania po zgjeron njëkohësisht aktivitetin drejt reklamave, programeve të drejtpërdrejta dhe lojërave, fusha që i konsideron me rëndësi për rritjen e ardhshme, ndërsa nuk iu përgjigj menjëherë një kërkese për koment.

Drejtuesit u kanë thënë punonjësve se, pavarësisht shkurtimeve, kompania mbetet në rrugën e parashikimit të saj vjetor dhe se do të vijojë të investojë fuqishëm në fushat ku e sheh ndikimin më të madh.