New York hap ‘Audible Story House’, librat tani përjetohen përmes dëgjimit, jo leximit

Në New York është hapur këtë muaj “Audible Story House”, një koncept i ri librarie ku vizitorët nuk lexojnë libra të shtypur, por i përjetojnë historitë përmes dëgjimit.

Hapësira e krijuar funksionon si një qendër kulturore dhe sallë dëgjimi, ku njerëzit mund të dëgjojnë qindra tituj me kufje ose të relaksohen në ambiente të posaçme.

Sipas kompanisë, projekti synon të pasqyrojë rritjen e shpejtë të popullaritetit të audiolibrave dhe rikthimin e interesit për përvojat sociale jashtë botës online.

Drejtuesi global i marketingut në Audible, James Finn, tha se komunitete si “BookTok” në TikTok kanë ndikuar ndjeshëm në promovimin e librave dhe autorëve te audiencat e reja.

Në ambientet e “Story House” do të organizohen gjithashtu klube libri, diskutime me autorë dhe seanca relaksuese me tinguj audio, ndërsa koleksioni i titujve do të përditësohet vazhdimisht sipas librave më të dëgjuar dhe më në trend.

Sipas Shoqatës së Botuesve të Audios, shitjet e audiolibrave në Shtetet e Bashkuara arritën në rreth 2 miliardë dollarë gjatë vitit 2024, duke u dyfishuar pothuajse krahasuar me pesë vite më parë.

Hapësira do të jetë e hapur gjatë gjithë muajit nga e mërkura deri të dielën, ndërsa Audible beson se e ardhmja e librave mund të mos lidhet gjithmonë me kthimin e faqeve.