Një muaj paraburgim për të dyshuarin për vrasjen e rëndë në Gjilan

Gjykata Themelore në Gjilan ka caktuar një muaj paraburgim ndaj B. D., i dyshuar për vrasje të rëndë dhe mbajtje në pronësi, kontroll ose posedim të paautorizuar të armëve, në rastin tragjik ku humbën jetën dy anëtarë të një familjeje në fshatin Demiraj të Gjilanit.

Vendimi është marrë më 2 nëntor 2026, pas aprovimit të kërkesës së Prokurorisë Themelore në Gjilan për caktimin e masës së paraburgimit.

Sipas kërkesës së prokurorisë, i dyshuari B. D. dyshohet se më 1 nëntor, pas mesnatës, në shtëpinë e tij në fshatin Demiraj, pas një konflikti fizik, e ka privuar nga jeta djalin e tij, A. D.

Ndërkaq, në të njëjtën shtëpi ishte gjetur pa shenja jete edhe fëmija D. D., me shenja dhune në shtratin e babait të saj, tashmë të ndjerit A. D., ku ishin vërejtur edhe njolla gjaku.

Sipas pretendimeve të prokurorisë, dyshohet se edhe vdekja e fëmijës është shkaktuar nga babai i saj, A. D. Kështu, nga veprimet e dyshuara, jetën e kanë humbur dy anëtarë të së njëjtës familje.

Gjykata ka bërë të ditur se gjyqtari i procedurës paraprake ka vlerësuar se ekzistojnë arsyet ligjore për caktimin e paraburgimit, pasi nëse i dyshuari do të lihej i lirë, mund të ndikonte te dëshmitarët, me qëllim të koordinimit dhe minimizimit të pasojave të veprimeve të ndërmarra.

Ndaj këtij vendimi, palët kanë të drejtë ankese në Gjykatën e Apelit të Kosovës./Telegrafi/