Një muaj paraburgim për tre të dyshuarit për mashtrim përmes platformave të rreme të investimeve

Gjykata Themelore në Prishtinë – Departamenti Special ka aprovuar kërkesën e Prokurorisë Speciale të Republikës së Kosovës dhe u ka caktuar masën e paraburgimit prej 30 ditësh të dyshuarve me iniciale M.P., I.H. dhe F.Z., siç njofton RTK.

Sipas njoftimit të gjykatës, të pandehurit dyshohen për katër vepra penale: pjesëmarrje ose organizim të grupit kriminal të organizuar, mashtrim, hyrje të paautorizuar kompjuterike dhe mashtrim kompjuterik, raporton Betimi për Drejtësi.

Pas seancës dëgjimore, gjyqtari i procedurës paraprake vlerësoi se paraburgimi është masa e vetme që siguron rrjedhën e papenguar të procedurës penale, për shkak të rrezikut të ikjes së të pandehurve, ndikimit në dëshmitarë e prova dhe përsëritjes së veprave. Palët kanë të drejtë ankese në Gjykatën e Apelit përmes Gjykatës Themelore në Prishtinë.

Vendimi vjen pas operacionit të 3 nëntorit, kur Policia e Kosovës dhe Prokuroria Speciale, në kuadër të një hetimi ndërkombëtar, zhvilluan kontrolle në pesë lokacione në Prishtinë, Fushë Kosovë dhe Ferizaj dhe arrestuan tre personat. Operacioni u shtri edhe në Shqipëri, Qipro, Izrael, Finlandë dhe Maqedoni të Veriut.

Sipas hetimeve, të dyshuarit paraqiteshin si agjentë apo ndërmjetës financiarë dhe mashtronin qytetarë, kryesisht gjermanishtfolës, duke i bindur të investonin në platforma të rreme investimesh dhe kriptovaluta, ku fitimet e shfaqura ishin të falsifikuara. Hetimet vazhdojnë. Personat e përmendur konsiderohen të pafajshëm derisa fajësia të vërtetohet me vendim të formës së prerë.