Nxirren edhe dy turistët e tjerë të bllokuar në kanionin e Gjipesë

Pas rreth tetë orësh operacion intensiv kërkim-shpëtimi, është bërë e mundur nxjerrja nga Kanionet e Gjipesë edhe e dy turistëve polakë që kishin mbetur të bllokuar.

Ekipet në terren arritën të nxirrnin dy prej turistëve fillimisht me helikopterin e FA rreth orës 20:00 ndërsa në orën 23:00 u arrit të nxirreshin dhe dy turistët e tjerë, një prej të cilëve kishte pësuar dëmtime dhe mori ndihmën e parë mjekësore.

Katër turistë u bllokuan në kanionet e Gjipesë, mesditën e së dielës. Ata kishin dalë për të eksploruar në terrenin e vështirë të Gjipesë, kur papritur ranë në një greminë, ku një prej tyre pësoi edhe fraktura. Pas lëshimit të alarmit SOS, menjëherë drejt vendit u nisën stacioni i policisë së Dhërmiut dhe njësia e zjarrfikëses të Himarës.

Në operacion u angazhuan efektivët e Stacionit të Policisë Dhërmi, alpinistët e FNSH-së, Njësia Delta, forcat zjarrfikëse të Himarës, si dhe ekipi mjekësor.

Autoritetet u bëjnë thirrje turistëve që të shmangin lëvizjet në shtigje të vështira pa guida të specializuara dhe pa pajisjet e nevojshme, për të evituar situata të ngjashme.