OKB – 80 shtete dënojnë ashpër sulmet e Iranit dhe rebelëve Houthi

NJU JORK, 24 shtator /ATSH-DPA/ – Në një deklaratë të përbashkët në Kombet e Bashkuara 80 shtete dënuan sot sulmet e Iranit në rajonin e Gjirit, si dhe ato të kryera nga rebelët Houthi në Gadishullin Arabik dhe në Detin e Kuq.

Shtetet dënuan Iranin për sulmet ndaj vendeve të rajonit dhe për kërcënimin që paraqet ndaj tregtisë ndërkombëtare dhe sigurisë energjetike.

Përfaqësuesja e Lartë e Bashkimit Evropian për Politikën e Jashtme, Kaja Kallas, dhe ministri i Jashtëm gjerman, Johann Wadephul, u shfaqën në Nju Jork në mbështetje të deklaratës, e cila u lexua nga ministri i Jashtëm i Bahreinit, Abdullatif bin Rashid al-Zayani.

Në deklaratë thuhej se veprimet e Iranit vazhdojnë të kërcënojnë sigurinë ndërkombëtare dhe lirinë e lundrimit.

Al-Zayani kërkoi që Ngushtica e Hormuzit, e cila është jetike për tregtinë ndërkombëtare të naftës, të mbahet plotësisht e hapur.

Ministri theksoi gjithashtu dënimin e fortë të shteteve për vendimin e rebelëve Huthi, të mbështetur nga Irani, për të rifilluar konfliktin në Jemen, si dhe për sulmet e vazhdueshme ndaj Arabisë Saudite dhe në Detin e Kuq.

”Përparimi i rebelëve Huthi drejt Ngushticës së Bab al-Mandabit do të përkeqësonte më tej kërcënimet ndaj sigurisë ndërkombëtare detare dhe tregtisë globale”, deklaroi Al-Zayani.

Rebelët Huthi, e mbështetur nga Irani, së fundmi mori kontrollin e bregdetit perëndimor të Jemenit përmes një ofensive të shpejtë, duke siguruar qasje në Ngushticën strategjike të Bab al-Mandabit, në hyrje të Detit të Kuq.

Ndërsa konflikti përshkallëzohet, Arabia Saudite u vu sërish nën sulm nga fqinji i saj jugor.

Rëndësia e Ngushticës së Bab al-Mandabit është rritur më tej si pasojë e krizës në Ngushticën e Hormuzit.

Kalimi përmes Ngushticës së Hormuzit është kufizuar ndjeshëm që nga fillimi i luftës së nisur nga Shtetet e Bashkuara kundër Iranit, ndërsa Teherani po përpiqet të kontrollojë trafikun detar në këtë ngushticë.

Pas sulmeve të shumta ndaj anijeve tregtare, shumë kompani të transportit detar po e shmangin ngushticën.

Përpjekjet për të arritur një marrëveshje të përhershme për lundrimin deri tani nuk kanë sjellë përparim të rëndësishëm. /Ad.Ab./ a.jor.