OKB -Zelensky: Putin po e tërheq botën në luftën e tij

NJU JORK, 23 shtator /ATSH-DPA/ – Presidenti ukrainas Volodymyr Zelensky dënoi sot nga tribuna e Organizatës së Kombeve të Bashkuara, “çmendurinë” vrasëse të presidentit rus Vladimir Putin, duke u bërë thirrje aleatëve të tij të ruajnë sanksionet ndaj Moskës, të cilat, sipas tij, janë mënyra e vetme për të ndërprerë financimin e luftës.

“Është çmenduri”, deklaroi Zelensky.

“Ai është pacienti zero, ai nga i cili kjo ide e luftës vazhdon të përhapet”, tha presidenti ukrainas, duke e vënë komunitetin ndërkombëtar përballë situatës së dhjetëra mijëra ushtarëve nga 47 vende, përfshirë Korenë e Veriut, që janë dërguar përkrah forcave ruse.

“A ka ende dikush që mendon se ai është i arsyeshëm dhe i moderuar?”, vijoi Zelensky.

Në të kundërt, ai përmendi rastin e dy ushtarëve koreano-veriorë të kapur robër nga Ukraina, të cilët më pas u dërguan në Korenë e Jugut.

Përballë këtij përshkallëzimi, Zelensky theksoi se objektivi i Ukrainës është kufizimi i aftësisë së Rusisë për të financuar luftën, për ta zgjatur atë dhe për ta bërë më brutale e shkatërruese.

“Kur Rusia ka para, ajo gjithmonë thotë jo, jo diplomacisë, dhe kjo është gjithashtu një formë vetoje ndaj paqes, jo një e drejtë zyrtare, por një veto reale”, u shpreh ai.

Presidenti ukrainas kritikoi gjithashtu Francën, e cila, sipas tij, ushtroi presion në Bruksel për heqjen e sanksioneve ndaj oligarkut rus Alicher Usmanov, një person i afërt me Vladimir Putinin, në këmbim të lirimit të një shtetasi francez të ndaluar në Azerbajxhan.

“Kur dikush në botë dobëson sanksionet ndaj oligarkëve rusë, kjo mund ta bëjë jetën më të rehatshme për rusët e pasur, por gjithashtu i jep më shumë kohë luftës, më shumë kohë Putinit”, deklaroi Zelensky.

“Prandaj, të ardhurat e Rusisë duhet të mbeten një objektiv”, theksoi presidenti ukrainas, duke përsëritur qëndrimin e tij se presioni ekonomik ndaj Moskës duhet të vazhdojë për të kufizuar aftësinë e saj për të financuar konfliktin. /Ad.Ab./ a.jor.