OpenAI do të shesë modelet e saj kryesore përmes Google Cloud

OpenAI do t’i bëjë modelet e saj më të avancuara të inteligjencës artificiale dhe agjentin e kodimit Codex të disponueshëm përmes Google Cloud gjatë javëve të ardhshme, njoftuan kompanitë të mërkurën, siç njofton Reuters, në një marrëveshje që thellon lidhjet mes dy rivalëve dhe tregon se ofruesit e mëdhenj të cloud-it po bëhen shpërndarësit kryesorë të modeleve më të mira të inteligjencës artificiale.

Partneriteti, sipas raportimit të Reuters, do të sjellë modelet më të fundit të OpenAI-t, si GPT-6 Astra, në Model Garden të Google Cloud. Klientët do të mund t’i blejnë ato përmes Google Cloud Marketplace dhe të përdorin angazhimet ekzistuese të shpenzimeve në cloud për blerjet, sipas postimit në blog të kompanisë, ndërsa OpenAI synon t’ua shesë modelet më shumë klientëve të biznesit.

Klientët në industritë e rregulluara do të kenë qasje në modelet e OpenAI-t përmes kontrolleve të qasjes, mjeteve të qeverisjes së të dhënave dhe infrastrukturës së Google Cloud, për të ndërtuar flukse pune me agjentë të inteligjencës artificiale, njofton Reuters.

Alphabet, kompania mëmë e Google, bëhet kështu ofruesi më i fundit i madh i cloud-it që ofron modelet e OpenAI-t për klientët e vet, pasi marrëveshja ekskluzive e shpërndarjes së OpenAI-t me Microsoft skadoi në prill. Që atëherë, siç njofton Reuters, OpenAI e zgjeroi shpërndarjen në Amazon Web Services dhe tani edhe në Google Cloud.

Marrëveshja i shton një shtresë tjetër marrëdhënies gjithnjë e më komplekse mes OpenAI-t dhe Google, të cilat konkurrojnë në produktet thelbësore të inteligjencës artificiale dhe në kërkim, edhe pse ekonomia e ndërtimit dhe e vendosjes së modeleve të mëdha i shtyn drejt bashkëpunimit. Google po e pozicionon njësinë e saj cloud si një platformë neutrale që u ofron klientëve zgjedhje më të gjerë modelesh, ndërsa drejtori ekzekutiv i Google Cloud, Thomas Kurian, i ka thënë më parë Reuters-it se platforma e Google është e hapur dhe mirëpret çdo model popullor te zhvilluesit.