Operacioni i pabesueshëm i “arratisjes” së Trump nga Turqia: Si u fsheh në një kontejner dhe fluturoi me avion ushtarak

Donald Trump u largua në fshehtësi nga Turqia drejt Britanisë muajin e kaluar me një avion ushtarak, ndërsa Shtëpia e Bardhë la të kuptohej se presidenti amerikan po udhëtonte me Air Force One. Operacioni i pazakontë u ndërmor për shkak të një kërcënimi të besueshëm iranian për atentat ndaj Trumpit, raportojnë Washington Post dhe New York Times.

Operacioni ndodhi ndërsa Trump ndodhej në Ankara për një samit të NATO-s me liderë botërorë, sipas Washington Post. Presidenti raportohet se hipi në avionin e vjetër Air Force One në sy të kamerave televizive, përpara se, vetëm pak minuta më vonë, të transportohej në fshehtësi drejt një avioni më të vogël përmes një mjeti që përdoret zakonisht për ngarkimin e ushqimeve dhe furnizimeve të tjera në avionë, tha një zyrtar amerikan për gazetën.

Operacioni u konfirmua gjithashtu nga një zyrtar për New York Times.

Vendndodhja reale e Trumpit iu mbajt e fshehtë gazetarëve dhe madje edhe disa anëtarëve të stafit të Shtëpisë së Bardhë. Një zyrtar amerikan i tha Washington Post se një kërcënim i besueshëm për jetën e Presidentit, ardhur nga Irani, kishte vënë në lëvizje “operacionin e mashtrimit”.

Administrata kishte deklaruar më parë se Trump ishte larguar nga Turqia më 8 korrik me avionin e vjetër Air Force One. Vetë presidenti kishte njoftuar në Truth Social se do të përdorte “ish-Air Force One” dhe jo avionin me të cilin kishte mbërritur në Turqi, një Boeing 747-8 i ri i dhuruar nga Katari.

Udhëtimi drejt samitit të NATO-s ishte fluturimi i parë ndërkombëtar për avionin e ri, përshtatja e shpejtë e të cilit kishte ngritur pikëpyetje mbi kostot dhe sigurinë. Vizita zhvillohej gjithashtu në një moment kur tensionet me Iranin, që kufizohet me Turqinë, ishin përshkallëzuar.

Përpara largimit nga Ankaraja, Trump shkroi në Truth Social se do të përdorte avionin e vjetër Air Force One, me ngjyrë blu të çelët, “për hir të kohëve të vjetra”, për të fluturuar drejt bazës RAF Mildenhall në Britani. Ndërkohë, avioni i ri do të ndalonte në të njëjtën bazë, në mënyrë që ushtarakët amerikanë të vendosur atje të mund ta vizitonin.

Pasi Trump hipi në avionin e vjetër Air Force One përpara kamerave në Ankara, ai u transportua në fshehtësi drejt një avioni më të vogël, një C-32A të Forcave Ajrore amerikane, raportoi Washington Post, duke iu referuar një zyrtari amerikan me dijeni mbi operacionin dhe materialeve të tjera të verifikuara nga gazeta.

Sipas Washington Post, operacioni i mashtrimit u aktivizua nga një kërcënim i besueshëm ndaj presidentit. Një operacion i ngjashëm ishte përdorur edhe në vitin 2000, kur Bill Clinton fluturoi drejt Pakistanit me një avion pa shenja dalluese, ndërsa Air Force One u përdor si karrem.

Këtë herë, gazetarëve që mendonin se po udhëtonin bashkë me Trumpin në avionin e vjetër Air Force One iu kërkua të mbanin të mbyllura perdet e dritareve në kabinën e medias. Sipas Washington Post, përveç gazetarëve, edhe disa punonjës të Shtëpisë së Bardhë besonin se presidenti ndodhej në bord.

Kur më vonë gazetarët e pyetën Trumpin se përse u ishte kërkuar të mbanin mbyllur dritaret gjatë fluturimit, ai u përgjigj se kjo ndodhte sepse ata “ndoshta po bënin një fluturim të rrezikshëm”.

“Nëse më heqin qafe mua, ju heqin edhe ju. Apo jo?”, shtoi ai.

Avioni C-32A që transportonte Trumpin fluturoi drejt Britanisë dhe mbërriti rreth orës 22:20 me orën lokale. Avioni i vjetër Air Force One me gazetarët në bord mbërriti vetëm pak minuta më vonë, sipas Washington Post.

New York Times raportoi se Trump u transportua me automjet nga avioni i tretë, me të cilin kishte mbërritur, drejt avionit të vjetër Air Force One. Ai hipi në të përmes një hyrjeje tjetër dhe më pas zbriti nga dera e sipërme në anën e majtë, siç bën zakonisht, sipas një zyrtari amerikan.

Gazetarët që udhëtonin me presidentin raportuan se Trump zbriti shkallët e avionit të vjetër Air Force One në orën 22:56. Ai bëri shenjën e paqes drejt medias, por nuk shkoi të fliste me gazetarët. Më pas kaloi pak kohë duke përshëndetur ushtarakët amerikanë, përpara se të shkonte drejt avionit të ri të dhuruar nga Katari.

E pyetur për zbulimin se presidenti kishte udhëtuar në fshehtësi me një avion të tretë, Shtëpia e Bardhë përcolli një deklaratë të drejtorit të komunikimit Steve Cheung, i cili tha se avioni i dhuruar nga Katari është pajisur me protokolle sigurie të nivelit të lartë për të garantuar mbrojtjen e presidentit dhe stafit të tij.

“Siç ka thënë së fundmi presidenti, ka shumë armiq të Amerikës që e kanë vënë atë në shënjestër dhe ne përdorim çdo mjet që kemi në dispozicion për t’iu përgjigjur këtyre kërcënimeve”, tha Cheung. /The Guardian