Pagat e magjistratëve, reagon Gjykata Kushtetuese: Kuvendi të zbatojë vendimin tonë!

Gjykata Kushtetuese ka reaguar lidhur me diskutimet publike për pagat e magjistratëve dhe mënyrën e zbatimit të vendimit të saj, të publikuar në 17 shkurt të këtij viti.

Në një deklaratë për mediat, Gjykata thekson se për këtë çështje është shprehur tashmë përmes vendimit të saj. Sipas saj, vendimi përcakton standardin kushtetues që duhet të zbatohet, si dhe detyrimet që burojnë prej tij për autoritetet përgjegjëse.

GJK sqaron gjithashtu se mënyra e përllogaritjes dhe ekzekutimit të pagave në administrimin e saj të brendshëm, në varësi të fondeve buxhetore, nuk përcakton efektet juridike të vendimit. Për rrjedhojë, Gjykata Kushtetuese thekson se zbatimi i vendimit nr. 15 duhet të bëhet në përputhje me standardet dhe detyrimet kushtetuese të përcaktuara prej saj.

Në lidhje me diskutimet publike për çështjen e pagave të magjistratëve, Gjykata Kushtetuese vlerëson të nevojshme të sqarojë se për këtë çështje është shprehur tashmë me vendimin nr. 15, datë 17.02.2026

Përmes këtij vendimi, Gjykata Kushtetuese ka përcaktuar standardin kushtetues të zbatueshëm, duke evidentuar njëkohësisht detyrimet që burojnë prej tij për autoritetet përgjegjëse. Arsyetimi dhe dispozitivi i vendimit përbëjnë qëndrimin zyrtar të Gjykatës për çështjen e shqyrtuar dhe, për rrjedhojë ato duhet të lexohen e të zbatohen në tërësinë e tyre, në përputhje me parimet kushtetuese të përcaktuara në të.

Gjykata rithekson se vendimet e saj janë përfundimtare dhe të detyrueshme për zbatim. Respektimi dhe zbatimi i tyre përbën një kërkesë të drejtpërdrejtë të rendit kushtetues dhe është i lidhur ngushtësisht me parimin e shtetit të së drejtës dhe të sigurisë juridike.

Në këtë kuptim, Gjykata sqaron se mënyra e përllogaritjes dhe e ekzekutimit të pagave në administrimin e brendshëm të saj, në varësi të fondeve buxhetore në dispozicion, nuk mund të interpretohet si përcaktuese për efektet juridike të vendimit nr. 15, datë 17.02.2026 dhe as për detyrimet që ky vendim sjell për autoritetet përgjegjëse për zbatimin e tij.