PARIS – Rutte dhe Zelensky në samitin e “Koalicionit të të Gatshmëve”, në fokus mbështetja për Ukrainën

– Sekretari i përgjithshëm i NATO-s, Mark Rutte, dhe presidenti i Ukrainës, Volodymyr Zelensky, do të marrin pjesë të hënën në samitin e “Koalicionit të të Gatshmëve” që do të zhvillohet në Paris, ku udhëheqësit e vendeve aleate, do të diskutojnë forcimin e mbështetjes për Ukrainën, sipas “Reuters”.

Lajmi u konfirmua nga Presidenca franceze, e cila bëri të ditur se takimi synon të vijojë koordinimin e vendeve partnere, pas samitit të NATO-s të mbajtur këtë javë, në Turqi.

Një nga temat kryesore të diskutimit do të jetë përgatitja e garancive të sigurisë, që do t’i ofrohen Ukrainës, në rast se arrihet një armëpushim me Rusinë.

Sipas Pallatit Élysée, puna për hartimin e këtyre garancive është ende në zhvillim.

Presidenti francez, Emmanuel Macron, ka deklaruar se gjatë samitit do të prezantohen iniciativa të reja për forcimin e mbrojtjes evropiane, përfshirë zhvillimin e manovrave të përbashkëta ushtarake, duke theksuar se Evropa po merr një rol gjithnjë e më të madh në garantimin e sigurisë së saj.

Në axhendën e takimit do të jenë gjithashtu lufta kundër të ashtuquajturës “flotës hije” të Rusisë, e përdorur për të shmangur sanksionet ndërkombëtare, rritja e kapaciteteve ushtarake të Ukrainës, mobilizimi i industrisë së mbrojtjes dhe thellimi i bashkëpunimit mes vendeve që mbështesin Kievin.

Presidenca franceze njoftoi se Moldavia dhe Maqedonia e Veriut i janë bashkuar “Koalicionit të të Gatshmëve”, duke zgjeruar numrin e vendeve pjesëmarrëse në këtë nismë.

Në samitin e Parisit pritet të marrin pjesë edhe presidentja e Komisionit Evropian, Ursula von der Leyen, dhe presidenti i Këshillit Evropian, António Costa.

Takimi zhvillohet në një kohë kur aleatët perëndimorë, po intensifikojnë përpjekjet për të koordinuar mbështetjen politike, ushtarake dhe financiare për Ukrainën, ndërsa vazhdojnë përpjekjet diplomatike për t’i dhënë fund luftës me Rusinë. /