Partizani fiton ne Andora

Partizani ka luajtur të martën pasdite takimin e parë të turit të dytë eliminator të Ligës së Konferencës, aty ku ka qenë në mysafire në Andorrë për t’u ndeshur me skuadrën vendase të Atletik Eskaldes. Në fakt, ndeshja ka parë të kuqtë e drejtuar nga trajneri Zoran Zekiç ta mbizotërojnë lojën, por pa arritur ta konkretizojnë siç duhet vëllimin e bërë dhe rastet e ndërtuara për shënim. Përtej një epërsi të lehtë, 45 minutat e para janë luajtur nën nivelin mesatar, me skuadrën vendase që mbrohet ngjeshur dhe me Partizanin që ka vuajtur për ta thyer qëndresën e kundërshtarëve.

Edhe pse rastet nuk kanë munguar për ekipin shqiptar, pjesa e parë do të mbyllet me rrjeta të paprekura, ndërsa ajo e dyta do t’i shohë të kuqtë ta zhvendosin lojën tërësisht në gjysmëfushën kundërshtare. E si rezultat i kësaj trysnie ka ardhur edhe goli i parë i Partizanit, pasi Kristian Mba i ka rrëmbyer topin portierit vendas dhe e ka përcjellë në rrjetë.

27 minutat e mbetura të pjesës së dytë dhe ato 8 shtesë kanë parë Partizanin të vazhdojë të mbizotërojë e të ndërtojë raste për shënim, por duke vijuar t’i shpërdorojë ato, pa e gjetur dot edhe një gol tjetër në Andorrë. Mbyllet kështu me rezultatin 1-0 në favor të Partizanit kjo përballje me Atletik Eskaldes dhe skuadra e trajnerit Zoran Zekiç merr një fitore minimale, por të vyer, në fushë të huaj.