Partizani U-19 fiton Kupën e Shqipërisë

Partizani është fitues i Kupës së Shqipërisë U-19. Të kuqtë triumfuan në finalen e zhvilluar ndaj Teutës me rezultatin 3-0.

Një paraqitje bindëse e skuadrës së Partizanit, që administroi mirë finalen dhe siguroi trofeun falë golave të shënuar nga Banushi dhe Qokthi, me këtë të fundit që realizoi dy herë në pjesën e dytë.

Partizani kaloi në avantazh në minutën e 43-të me Banushin, ndërsa pak minuta më vonë mbeti me 10 lojtarë pas daljes me karton të kuq të Qamilit.

Pavarësisht inferioritetit numerik, të kuqtë ruajtën kontrollin e lojës edhe në pjesën e dytë dhe vulosën suksesin me dy golat e Qokthit në minutat 76 dhe 90, duke mbyllur takimin me fitoren 3-0.

Në përfundim të ndeshjes u zhvillua ceremonia e organizuar nga FSHF, ku trofeu dhe medaljet iu dorëzuan skuadrës së Partizanit U-19 nga anëtari i Komitetit Ekzekutiv të FSHF-së, Gjergji Petro.