PD: Nuk u arrit konsensus për rezolutën e Komitetit Parlamentar Shqipëri-BE

Partia Demokratike ka deklaruar se Komiteti Parlamentar për Stabilizim-Asociim Shqipëri–Bashkimi Europian nuk arriti të miratojë një rezolutë të përbashkët për procesin e integrimit europian të Shqipërisë. Sipas PD-së, shkak për mungesën e konsensusit ishte refuzimi nga mazhoranca socialiste i më shumë se 30 amendamenteve të propozuara nga opozita, të cilat, sipas saj, kishin mbështetjen edhe të eurodeputetëve.

Në një deklaratë për mediat, Partia Demokratike pretendon se amendamentet e paraqitura lidhen me çështje kyçe për procesin e integrimit, përfshirë luftën kundër korrupsionit, forcimin e shtetit të së drejtës, zbatimin e vendimeve të gjykatave, veçanërisht të Gjykatës Kushtetuese, si dhe rritjen e transparencës dhe llogaridhënies së institucioneve.

Sipas opozitës, përfaqësuesit e Partisë Socialiste votuan kundër këtyre propozimeve, pavarësisht mbështetjes që ato morën nga anëtarët e Parlamentit Europian në Komitetin Parlamentar për Stabilizim-Asociim Shqipëri–BE. PD deklaroi se mbetet e angazhuar për procesin e integrimit europian të vendit, por theksoi se anëtarësimi në Bashkimin Europian kërkon reforma konkrete dhe jo vetëm deklarata politike.

“Lufta pa kompromis kundër korrupsionit dhe krimit të organizuar, respektimi i shtetit të së drejtës, zbatimi i vendimeve të gjykatave dhe përmirësimi i standardeve të jetesës janë kushtet themelore për avancimin e Shqipërisë drejt Bashkimit Europian”, thuhet në deklaratën e Partisë Demokratike.