PD përsërit thirrjen për protestë. Duma: Qytetarët po vetëflijohen, e keqja duhet shkulur

Partia Demokratike ka bërë sërish thirrje sot për një protestë mbarëqytetare në kryeqytet ditën e enjte.

Sekretarja për Marrëdhëniet me Publikun në PD, Grida Duma, tha në një deklaratë për shtyp se oligarkët po bëjnë ligjin, ndërkohë që qytetarët po vetëflijohen, duke përmenduar rastet e disa personave që kanë vrarë veten për shkak të faturave të larta të energjisë elektrike apo mungesës së ndihmës nga shteti, si ai i Dhurata Mihos dje në Vlorë. Në këtë këndvështrim, Duma theksoi se “e keqja duhet shkulur me rrënjë” dhe përsëriti thirrjen për pjesëmarrje në protestën e ditës së enjte.

Deklarata e Partise Demokratike

“Brenda një jave, arroganca e qeverisë dhe e oligarkëve të saj lokalë, luajti me jetën e tre qytetarëve, dy prej të cilëve u vetëflijuan, ndërsa gruaja nga Novosela arriti të mbijetojë në spital. Albana Mataj u vetvra pasi u hoq nga puna pa motiv, mësuese prej shumë vitesh në Shkollën Tregtare në Vlorë. Gjovalin Lazri 53 vjeç, kryefamiljar nga Lezha, u vetra për shkak se nuk përballonte faturën abuzive të energjisë dhe errësirën ku e la qeveria.

Dhurata Miho, kryefamiljare nga Novosela, u vetflijua sepse komuna e kishte lënë jashtë skemës së përfitimit, edhe pse ajo vuajti pasoja të tmerrshme nga përmbytjet. Për fat të mirë, Dhurata mbijetoi, falë ndërhyrjes së shpejtë të djemve të saj dhe sot po mjekohet në spital.

Aktet e dëshpëruara të qytetarëve të braktisur nga qeveria, janë një akuzë e drejtpërdrejtë për Edi Ramën e Ilir Metës, të cilët janë përfshirë në luftën për pushtet, për influencë, për territore e para. Atyre nuk u intereson më jeta e vështirësitë që po hasin çdo ditë shqiptarët.

Dëshmitë e familjarëve, janë një akuzë e drejtpërdrejtë për Edi Ramën e oligarkinë e tij, për arrogancën e pandjeshmërinë e tyre. Edi Rama dhe Ilir Meta e bandat e tyre, po u thonë cdo ditë qytetarëve se ata janë aty për axhendën personale, për të ndarë tendera, për të ndarë tortën e pushtetit dhe nuk janë aty për të shërbyer.

Partia Demokratike, dhe qytetarët, do të jenë të enjten me 12 mars e çdo ditë, aty ku duhet, në këmbë, në ballë të protestës, për ta ndalur të keqen. Kjo e keqe duhet shkulur nga rrënjët, përpara se të marrë jetë të tjera njerëzish.