PDK: Kryeparlamentari nxirret të enjten në votim, s’ka kandidat tjetër pos Veselit
Në seancën e 24 gushtit pritet që të ndodhë konstituimi i Kuvendit të Kosovës. Po atë ditë edhe propozohet Kadri Veseli për kryeparlamentar nga koalicioni PAN. Kështu thotë për Express Enver Hoxhaj i PDK-së.
Nënkryetari i Partisë Demokratike të Kosovës, Enver Hoxhaj, shprehet i bindur se Kuvendi konstituohet të enjten e ardhshme. E bën të ditur se nuk ka kandidat tjetër për kreun e Kuvendit, përveç Kadri Veselit.
“Po! Atë ditë do e propozojmë kandidatin për kryetar të Kuvendit që është zoti Veseli dhe kandidatët për nënkryetarë të Kuvendit, që do të thotë bëhet konstituimi i Kuvendit”, është shprehur Hoxhaj, derisa nuk ka preferuar të flasë nëse i kanë siguruar numrat për seancën e radhës, të gjashtën me radhë.
Kujtojmë se seancat e kaluara dështuan që të mbaheshin pasi koalicioni PAN kishte munguar. Kjo ka bërë që të mos ketë kuorum të mjaftueshëm për vazhdimin e seancës.
Kryesuesi i Kuvendit, Adem Mikullovci, vendosi dje në takimin konsultativ që të pranojë kërkesën e PAN-it që seanca të mbahet kur ata e kanë vendosur. Zgjedhjet janë mbajtur më 11 qershor pasi Qeveria “Mustafa” u rrëzua nga Parlamenti përmes një mocioni të opozitës.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.