Pelegrinazhi në Malin e Tomorit kulmon me ditën e Abaz Aliut, Baba Mondi: Të ruajmë paqen dhe respektin për njëri-tjetrin

Mijëra besimtarë nga Shqipëria dhe vende të ndryshme janë mbledhur në Malin e Tomorit për pelegrinazhin tradicional në nderim të Abaz Aliut.

Sot, 22 gusht, shënohet dita kulmore e festimeve, ndërsa pelegrinazhi do të vijojë deri më 25 gusht.

Kryegjyshi Botëror Bektashian, Haxhi Dede Baba Mondi u shpreh gjatë ceremonisë së mbajtur se një nga vlerat më të mëdha të pelegrinazhit është bashkimi i njerëzve nga qytete, krahina dhe vende të ndryshme.

“Një nga bukuritë më të mëdha të këtij pelegrinazhi është se këtu takohen njerëz të ndryshëm, nga qytete e krahina të ndryshme, nga troje shqiptare dhe vende të ndryshme të botës. Këtu na bashkon një gjë shumë më e madhe se dallimet tona: besimi në paqe, dashuria për njeriun dhe respekti për atë që është e shenjtë”, tha Baba Mondi.

Ai u bëri thirrje besimtarëve të ruajnë paqen, dashurinë dhe respektin për njëri-tjetrin.

“Nga ky mal i shenjtë dëshiroj t’u drejtohem sot të gjithë shqiptarëve: të mos e humbim kurrë dashurinë për njëri-tjetrin. Të ruajmë familjen, respektin, fjalën e mirë dhe nderin. Të kujdesemi për fëmijët, të moshuarit, njerëzit në nevojë dhe për çdo njeri që kërkon ndihmën tonë”, u shpreh Baba Mondi.

Për mbarëvajtjen e pelegrinazhit që vijon deri më 25 gusht janë marrë masa nga Policia dhe strukturat lokale, me qëllim menaxhimin e lëvizjes dhe garantimin e sigurisë së mijëra besimtarëve që po ngjiten drejt Malit të Tomorit.

Që prej ditëve të para, pelegrinët janë ngjitur drejt Teqesë së Kulmakut, ku zhvillojnë ritet tradicionale, ndezin qirinj, luten dhe kryejnë pelegrinazhin në vendin e shenjtë. Ndërsa një nga ritualet kryesore të këtyre festimeve është flijimi i qengjit, i cili më pas piqet dhe ndahet mes besimtarëve.