Përplasja mes qeverisë dhe “Drejtësisë” për pagat e gjyqtarëve, Gogu: Boshllëku ligjor shkaktoi problemin, zgjidhja është në Kuvend me ligj

Ministri i Drejtësisë, Toni Gogu, ka komentuar debatet lidhur me pagat e anëtarëve të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP), duke bërë thirrje për dialog institucional dhe zgjidhjen e çështjes përmes Kuvendit.

Gjatë një konference për shtyp, Gogu u shpreh se institucionet nuk duhet të përplasen me njëra-tjetrën për çështjen e pagave, por të gjejnë një zgjidhje përmes diskutimit dhe procesit parlamentar.

Debati për pagat e anëtarëve të KLGJ-së dhe KLP-së ka sjellë diskutime mes institucioneve, ndërsa ministri i Drejtësisë kërkon që çështja të trajtohet në mënyrë institucionale dhe të marrë një zgjidhje përfundimtare përmes Kuvendit.

“Zgjidhja nuk është që institucionet të përplasen me njëra-tjetrën, por që çështja të diskutohet në Kuvend në ditët në vijim. Nuk mund të kthehemi në ditët kur ushqejmë konflikt. Pagat kanë nevojë për autorizim ligjor dhe formulë ligjore, dhe kjo do të nisë menjëherë me fillimin e sesionit të ri parlamentar. Përpjekjet e qeverisë kanë qenë vazhdimisht që të mos vonohen pagat e gjyqtarëve”, tha Gogu.

Gogu theksoi se shmangia e përplasjeve institucionale dhe gjetja e një zgjidhjeje përfundimtare do të jetë një prej drejtimeve të punës së tij në krye të Ministrisë së Drejtësisë.

“Ky do të jetë drejtimi ynë dhe kjo do të jetë edhe detyra ime në rolin që kam, për të zgjidhur këtë mosmarrëveshje apo moskuptim të një situate, njëherë e përgjithmonë”, u shpreh Gogu.

Ne përditësim…