Pije alkoolike, telefona e drogë në burgun e Fierit, arrestime e procedime zyrtarësh

Në burgun e Fierit janë zhvilluar sot në 23 maj kontrolle të përbashkëta nga Agjencia e Mbikëqyrjes në Sistemin e Ekzekutimit të Vendimeve Penale dhe Drejtoria e Përgjithshme e Burgjeve.

Gjatë këtyre kontrolleve u zbulua një sasi e konsiderueshme pijesh alkoolike në një nga dhomat e institucionit. Po ashtu, në ambiente të ndryshme të përbashkëta u gjetën disa telefona celularë të futur në mënyrë të paligjshme.

Në kontrollin e ushtruar ndaj një të burgosuri u konstatua edhe një sasi lënde e dyshuar narkotike e fshehur në veshje, raporton gazetarja e Klan News Glidona Daci.

Prokuroria e Fierit ka urdhëruar arrestime në flagrancë ndaj dy të burgosurve. Njëri prej tyre dyshohet për futjen dhe mbajtjen e sendeve të ndaluara në IEVP, ndërsa tjetri për veprat penale të posedimit të lëndëve narkotike dhe sendeve të ndaluara.

Ndërkaq, ka nisur procedimi penal ndaj disa punonjësve të IEVP Fier për shpërdorim detyre.

Njoftimi:

Në vijim të informacioneve të siguruara dhe  kontrolleve të përbashkëta midis Agjencisë së Mbikqyrjes në Sistemin e Ekzekutimit të Vendimeve Penale (AMSEVP) dhe Drejtorisë së Përgjithshme të Burgjeve (DPB), për goditjen e paligjshmërisë në Sistemin Penitenciar, sot më datë 23.05.2026 u kryen kontrolle në IEVP Fier.

Në përfundim të veprimeve opeacionale, u konstatua nje sasi e konsiderueshme pijesh alkoolike ne një prej  dhomave te kësaj IEVP-je, si edhe disa telefona celularë në mjedise të ndryshme të përbashkëta.

Gjithashtu, nga kontrolli personal i një shtetasi të paraburgosur në këtë IEVP u konstatua një sasi me lëndë të dyshuar narkotike, të fshehur ne veshjet personale.

Në përfundim të veprimeve proceduriale në drejtimin e Prokurorisë pranë Gjykatës së Shkallës së Parë Fier, OPGJ të AMSEVP kreu:

● Arrestimin në flagrancë të shtetasit I.B pasi dyshohet se ky shtetas ka konsumuar elementët e figurës së veprës penal “Futja dhe mbajtja e sendeve të ndaluara në IEVP” parashikuar nga neni 324/a i Kodit Penal. Aktualisht, ky shtetas ndodhet i paraburgosur në këtë IEVP për veprën penale “Prodhim dhe mbajtje pa leje të armëve luftarake “ parashikuar nga neni 278/4 dhe 189 i Kodit Penal.   

● Arrestimi në flagrancë i shtetasit A.M. pasi dyshohet se ka konsumuar elementët e veprave penale të “Prodhim dhe shitje narkotikësh” dhe “Futja dhe mbajta e sendeve të ndaluara në IEVP,” parashikuar nga neni 283 dhe 324/a i K. Penal. Aktualisht ky shtetas është i dënuar me 12 vjet burgim për veprën penale të ” Vrasje me dashje” parashikuar nga neni 76 i Kodit Penal.

● Ka filluar procedimi penal në gjendje të lirë për veprën penale “Shpërdorimi i detyrës” parashikuar neni 248 i Kodit Penal, për punonjësit e IEVP Fier:

1- A. H Shefi i policisë në IEVP Fier,

2- N.H Shefi i regjimit te brendshëm ,

3-A M specialist policie,

4-A.M kontrollor

5-O.K kontrollor

6-R.S. kontrollor.