Pjesë e Clinton Global Initiative, Osmani ndan fotografi nga New Yorku me Bill Clintonin

Ish-presidentja e Kosovës, Vjosa Osmani, po merr pjesë në aktivitetet e Clinton Global Initiative (CGI) në New York, ku është takuar me ish-presidentin e Shteteve të Bashkuara, Bill Clinton.

Osmani ka publikuar një fotografi me Clintonin, duke shkruar: “Me Presidentin Bill Clinton në pritjen e organizuar nga Clinton Global Initiative.”

Clinton Global Initiative, nismë e themeluar nga Bill Clinton, po zhvillon më 22–23 shtator 2026 takimin vjetor në New York, me pjesëmarrjen e liderëve nga politika, biznesi, filantropia dhe shoqëria civile.

Sipas programit të publikuar për aktivitetin e këtij viti, Vjosa Osmani është pjesë e listës së pjesëmarrësve dhe është paraparë të marrë pjesë në një panel mbi lidershipin dhe qëndrueshmërinë.

Ky nuk është takimi i parë i Osmanit me Clintonin në kuadër të CGI. Edhe në vitin 2025, ish-presidentja e Kosovës mori pjesë në takimin vjetor të nismës në New York dhe ishte pjesë e një paneli së bashku me Bill Clintonin. /Telegrafi/