Plagoset me armë zjarri një person në Ferizaj

Një person ka mbetur i plagosur me armë zjarri në orët e hershme të mëngjesit të së shtunës në Ferizaj. Policia është njoftuar rreth orës 03:40 se në një parking në rrugën “12 Qershori” ishte plagosur një person, i cili ishte dërguar për trajtim mjekësor në Emergjencën e Ferizajt.

Në vendin e ngjarjes kanë dalë njësitet policore të stacionit policor në Ferizaj, e më pas edhe hetuesit së bashku me Forenzikën Rajonale, të cilët kanë kryer ekzaminimin e vendit. Është njoftuar prokurori i shtetit, i cili ka autorizuar ndërmarrjen e veprimeve të nevojshme hetimore.

Sipas veprimeve të para hetimore dhe këqyrjes së pamjeve nga kamerat e sigurisë, dyshohet se personi i plagosur, derisa po lëvizte në parking, ka rrëshqitur dhe gjatë rënies i është shkrepur arma e zjarrit, të cilën dyshohet se e kishte në çantën e tij, duke e plagosur veten në këmbë.

Pas trajtimit fillestar në Emergjencën e Ferizajt, i plagosuri F. J., 20-vjeçar, është dërguar në QKUK-Prishtinë për trajtim të mëtejmë. Gjatë kontrollit të çantës së të lënduarit, përveç armës së zjarrit, është gjetur edhe një sasi e vogël e substancës së dyshuar narkotike marihuanë.

Rasti mbetet nën hetim nga Sektori Rajonal i Hetimeve, në koordinim me Prokurorinë Themelore në Ferizaj.

Burimi: Indeksonline