“Plan për të djegur Kuvendin” Meta e zbulon në Kuvend: C’pritej në protestën e 8 qershorit

Ndërsa listoi arsyet pse vendosi të shfuqizojë dekretin që anulonte zgjedhjet e 30 qershorit, presidenti Ilir Meta, tha se primare ishte siguria kombëtare dhe stabiliteti i vendit. Meta zbuloi për herë të parë se kishte marrë informacion se me 8 qershor, datën e protestës së opozitës së bashkuar, kishte informacione të besueshme se persona të caktuar do të destabilizonin vendin dhe kishin në plan djegien e Kuvendit.

“Në themel të kushtetutës është pluralizmi politik dhe zgjedhjet e lira dhe të ndershme. cdo lloj afati është sekondar ndërsa parësor është mbrojtja e të drejtës me zgjedhje. më qartë se sa gjykata askush nuk mund ta sqarojë. Sa i takon aspekteve të tjera,  një arsye themelore, është siguria kombëtare, stabiliteti i vendit. Mund t’ju them që Presidenti për shkak të detyrës ka patur informacione si në rrugë zyrtare edhe shtetërore, për përpjekje për të realizuar akte destabilizimi.Në mënyrë të vecantë në datën 7 qershor një ditë para se presidenti të bënte publik vendimin për shfuqizimin e datës 30 qershor ka marrë një informacion që është sekret dhe i klasifikuar, nëse komisioni do të njihet mund të ndodhë, pasi të merrej leja dhe te verifikohen certifikatat e sigurisë të anëtarëve të komisionit. Me pak fjalë, ky informacion bënte të qartë që persona të caktuar do të përpiqeshin të shfrytëzonin mitingun e opozitës më 8 qershor, edhe për djegien e kuvendit të Shqipërisë. Ishte informacion i ri por i besueshëm nëse kemi parasysh protestat e mëparshme, ngjarjet para kuvendit të Shqipërisë.

I keni parasysh deklarartat e ministrisë së brendshme për shumë policë të plagosur, duke e kombinuar këtë informacion mora ate vendim. Një ngjarje e cila mund të prodhonte pasoja për jetën e qytetarëve dhe shkatërrim të imazhit të vendit tonë që me aq ngjarje që ishin bërë deri në atë moment ishte shkatërruar. Historia e vendit tonë për fat të keq nga 2 prilli e deri në 21 janar është plot me ngjarje të tilla të hidhura ku përmes protestave e gjatë protestave kemi pasur viktima dhe isha i bindur se ishte detyra ime që të bëja gjithcka që në datën 8 qershor të evitohej në mënyrë të padiskutueshme një ngjarje e tillë. Jam i detyruar të shoh interesin kombëtar të vendit si president.“ tha Meta.