Polonia thërret Google, Meta dhe TikTok: kërkon veprim kundër përmbajtjeve të dhunshme pas sulmeve në shkolla

Polonia thirri të premten në Ministrinë e Çështjeve Dixhitale kompanitë e mëdha të internetit, mes tyre Google dhe Meta, duke u kërkuar të bëjnë më shumë për të frenuar përhapjen e përmbajtjeve të dhunshme në rrjet, siç njofton Reuters. Thirrja erdhi pas një serie sulmesh me thikë në shkolla, që kanë tronditur vendin ditët e fundit.

Sipas raportimit të Reuters, mijëra policë u dërguan këtë javë në shkolla për të garantuar sigurinë, pas tre sulmeve brenda katër ditësh që shkaktuan një valë kërcënimesh online dhe frikë mes nxënësve e mësuesve. Autoritetet në Varshavë thonë se lavdërimi i dhunës në disa cepa të internetit, përfshirë grupet që adhurojnë ideologjinë naziste apo vrasësit serialë, po ndikon dëmshëm te të rinjtë.

Ministri i Çështjeve Dixhitale, Krzysztof Gawkowski, tha në një konferencë për shtyp se pritshmëria e qytetarëve polakë është që askush të mos nxisë të tjerët drejt vetëvrasjes, të mos ketë përmbajtje që miratojnë kërcënime kriminale dhe përdoruesit të mos ekspozohen ndaj skenave të vrasjeve apo gjymtimeve. Ai bëri të ditur se nga 7 deri më 12 tetor Polonia sinjalizoi te kompanitë e internetit 89 raste përmbajtjesh të paligjshme të lidhura me sulmet dhe në dy të tretat e tyre kompanitë nuk morën asnjë masë.

Në takim morën pjesë përfaqësues të Google, Meta, TikTok, Discord dhe Telegram, ndërsa rrjeti X i Elon Musk ishte i ftuar, por nuk mori pjesë, sipas Reuters. Kompanitë nuk iu përgjigjën menjëherë kërkesave për koment.

Qeveria polake po përshpejton një projektligj që do ta bëjë më të lehtë dhe më të shpejtë heqjen e përmbajtjeve të dëmshme nga interneti. Sulmi i fundit ndodhi të shtunën, kur tre persona u plagosën në një institucion arsimor në Varshavë, pas sulmit të 8 tetorit në Leszczydol-Nowiny, ku një ish-nxënës 15-vjeçar vrau kujdestarin e shkollës dhe plagosi dy mësues, dhe atij në Ostroleka, ku një 19-vjeçar plagosi 10 persona.