Postoi Trumpin me IA në një varr, reagon Shtëpia e Bardhë: Mark Hamill, një person i sëmurë

Shtëpia e Bardhë e ka quajtur aktorin e “Star Wars”, Mark Hamill, “një person të sëmurë”, pasi ai postoi një imazh të gjeneruar nga inteligjenca artificiale të Presidentit të SHBA-së, Donald Trump, në një varr, së bashku me mbishkrimin “sikur”.

Imazhi, i postuar në llogarinë Bluesky të Hamill, tregonte Trumpin të shtrirë me sytë mbyllur, pranë një guri varri me mbishkrimin “Donald J. Trump 1946-2024”.

Hamill, i cili luajti rolin e Luke Skywalker në filmat origjinalë të Star Wars nga viti 1977 e tutje, më vonë e fshiu postimin dhe kërkoi falje.

“Në fakt, po i uroja të kundërtën e vdekjes, por kërkoj falje nëse e gjetët imazhin të papërshtatshëm”, shkroi ai.

Në postimin X, i cili tani është fshirë, Hamill shkroi se: Trump duhet të jetojë mjaftueshëm gjatë për të dëshmuar humbjen e tij të pashmangshme shkatërruese në zgjedhjet e mesit të mandatit, të mbahet përgjegjës për korrupsionin e tij të paparë, të shkarkohet, të dënohet dhe të poshtërohet për krimet e tij të panumërta. Mjaftueshëm gjatë për të kuptuar se do të turpërohet në librat e historisë, përgjithmonë”.

“Këta të çmendur të së majtës radikale thjesht nuk mund ta përmbahen. Kjo lloj retorike është pikërisht ajo që ka frymëzuar tre atentate për vrasje në dy vjet kundër Presidentit tonë”, shkruan Shtëpia e Bardhë.