Pr.ligji për rregullimin e sektorit energjetik, Karakaçi: Mbi 10 % e prodhimit sigurohet nga energjia fotovoltaike. Rritja ka sjellë fikjen e Kaskadës së Fierzës

Ministri i Energjisë dhe Infrastrukturës, Enea Karakaçi, njoftoi miratimin e projektligjit të ri për rregullimin e sektorit të energjisë elektrike, duke e cilësuar atë si një hap të rëndësishëm në modernizimin e kuadrit ligjor dhe përafrimin e tij me standardet e Bashkimit Europian.

Sipas ministrit, ligji aktual, i miratuar në vitin 2015, luajti një rol kyç në transformimin e sektorit energjetik në vend, por zhvillimet e viteve të fundit kanë bërë të nevojshëm hartimin e një ligji të ri që implementon të gjithë kuadrin ligjor të BE-së dhe adreson sfidat e reja të tregut energjetik.

“Miratuam projektligjin e rregullimit të sektorit të energjisë elektrike. Ligji i mëparshëm ishte i vitit 2015, i cili transformoi sektorin energjetik në vend, dhe tashmë nevojitej një ligj i ri që rregullon dhe implementon të gjithë kuadrin ligjor të BE-së dhe jo vetëm. Ky projektligj i ri ka disa elemente. Së pari, rregullon depozitimin e energjisë për konsumatorët dhe bizneset, si dhe do të rregullojë sektorin që nuk është vetëm hidrik, por ku kemi edhe energjinë fotovoltaike, e cila tashmë përbën mbi 10% të prodhimit të brendshëm të energjisë së rinovueshme.

Elementi i dytë i këtij projektligji është komponenti i integrimit europian dhe i Planit të Rritjes, prej të cilit Shqipëria përfiton fonde”, deklaroi Karakaçi.

Ministri theksoi se qeveria miratoi edhe ndërtimin e një impianti të ri fotovoltaik me kapacitet 96 megavat, investim që pritet të rrisë më tej prodhimin e energjisë nga burime të rinovueshme.

Karakaçi u shpreh se Shqipëria ndodhet në një fazë transformuese të sektorit energjetik, ku energjia e rinovueshme po fiton gjithnjë e më shumë peshë në prodhimin vendas.

“Miratuam edhe ndërtimin e një impianti fotovoltaik me kapacitet 96 megavat. Sot Shqipëria ka hyrë në një fazë transformuese për sa i përket energjisë, ku energjia e rinovueshme po merr një hov të madh. Kaskada e Fierzës sot është e fikur falë prodhimit të energjisë fotovoltaike”, tha ai.