PRAGË – Çekët votojnë për pushtetin vendor dhe Senatin, sfida e parë për Babis

PRAGË, 9 tetor /ATSH-DPA/- Çekia zhvillon sot zgjedhjet dyditore për pushtetin vendor dhe Senatin, në atë që përbën provën e parë të mbështetjes së qytetarëve për qeverinë e miliarderit Andrej Babis, i cili drejton vendin që prej dhjetorit.

Qendrat e votimit hapen në orën 14:00. Qytetarët do të kenë mundësi të votojnë edhe nesër.

Më shumë se 8 milionë qytetarë me të drejtë vote, do të zgjedhin këshillat bashkiakë dhe të qyteteve në mbi 6 200 njësi vendore.

Gjatë fushatës zgjedhore, një nga çështjet kryesore në qytetet e mëdha të vendit ishte mungesa e banesave.

Paralelisht, qytetarët do të votojnë edhe për një të tretën e vendeve në Senat, dhomën e lartë të parlamentit, ku zgjedhjet për këto vende zhvillohen çdo dy vjet.

Votimi do të përcaktojë nëse opozita liberale dhe konservatore do ta ruajë shumicën në Senat, apo nëse partitë në pushtet dhe aleatët e tyre do të arrijnë të fitojnë më shumë vende.

Presidenti çek, Petr Pavel, tërhoqi vëmendjen para zgjedhjeve, pasi njoftoi se nuk do të mund të votonte për shkak se ndodhej me pushime private jashtë Bashkimit Evropian.

Në rrethana të tjera, Pavel do të kishte mundur të votonte për këshillin vendor në fshatin e tij të lindjes, Cernoucky, në veriperëndim të vendit, i cili ka pak më pak se 330 banorë.

Në Çeki nuk lejohet votimi me postë për zgjedhjet vendore. /