Presidenti i Serbisë për vizitë dy ditore në Rusi

Presidenti serb Tomisllav Nikoliq ka arritur mbrëmë në Moskë. Ai do të qëndrojë për vizitë dyditore pune në Rusi. Sot ai t do të takohet me patriarkun e Moskës Kiril, ndërsa nesër edhe me shefin e shtetit rus, Vlladimir Putin, njofton Tanjug.

Kremlini, siç njofton TASS, ka kumtuar se në takimin e nesërm Putini me Nikoliqin do të bisedojnë për “partneritetin aktual dhe të ardhshëm strategjik midis Rusisë dhe Serbisë” dhe do të këmbejnë mendime për “aspektet kyçe të bashkëpunimit të mëtejmë në sferën politike, tregtare, ekonomike dhe humanitare”.

Dy presidentët do të përqendrohen edhe në “çështje aktuale në planin rajonal dhe ndërkombëtar”, shtohet në kumtesën e Kremlinit.

Nikoliq, i cili mbrëmë udhëtoi në Moskë, në pritje të vizitës deklaroi se Serbia dhe Rusia kanë “marrëdhënie politike ekskluzive” dhe se Moska e di se qytetarët serbë nuk dëshirojnë që vendi i tyre të jetë anëtare e NATO-s. “Rusia gjithmonë ka qenë një hap më përpara se që pritej në mbështetjen e saj për Serbinë”, deklaroi Nikoliq.