Projekt mbi 680 mijë euro për planifikimin dhe konservimin e monumenteve të Durrësit

Projekti i konservimit për amfiteatrin romak, forumin bizantin, termat romake dhe shtigjeve urbane në zonat arkeologjike A dhe B në Durrës ka për qëllim ruajtjen e monumenteve nga situatat e degradimit aktual, për të parandaluar probleme të mundshme të mëtejshme dhe për të lejuar zbatimin e zgjidhjeve vlerësuese, për të rritur kuptueshmërinë dhe atraktivitetin. Një garë publike me vlerë rreth 68 milionë lekë (mbi 680 mijë euro) synon në planifikimin e konservimit dhe gërmimeve arkeologjike në Durrës.

Thirrja e shpallur këto ditë nga Ministria e Turizmit, Kulturës dhe Sportit synon ndërhyrje të integruara në disa nga pikat më të rëndësishme arkeologjike në Durrës, përfshirë amfiteatrin, forumin bizantin të Durrësit dhe termat romake, si dhe rrjetin e shtigjeve urbane, që lidhin zonat arkeologjike A dhe B të qytetit. Sipas përshkrimit të thirrjes, projekti është një proces dokumentimi, sondazhesh dhe konservimi që synon të përcaktojë mënyrën e menaxhimit afatgjatë të monumenteve. Projekti parashikon edhe një vlerësim të plotë të gjendjes së monumenteve, ku evidentohen probleme si dëmtimet nga vegjetacioni, erozioni, lagështia dhe ndërhyrjet e papërshtatshme moderne. Sipas dokumentit , çdo ndërhyrje shihet si pjesë e një procesi të vazhdueshëm kërkimor, ku çdo fazë gërmimi mund të sjellë të dhëna të reja dhe të ndikojë në përshtatjen e planeve të punës.

Monumenti më i madh i Durrësit është amfiteatri, i cili është dhe në qendër të kësaj ndërhyrjeje. Amfiteatri është një nga monumentet më të mëdhenj në Shqipëri dhe një nga amfiteatrot e mëdhenj në Ballkan (të tjerët janë Salona, Pola, Philopopolis). Amfiteatri i Durrësit është unik në konceptimin dhe ndërtimin e tij.