Prokurorët evropianë hetojnë mbi fondet e BE-së në kampet e emigrantëve në Greqi

Prokurorët evropianë kanë nisur një hetim mbi mënyrën se si Greqia ka përdorur fondet e Bashkimit Evropian për ndërtimin e kampeve të emigrantëve, sipas dy zyrtarëve grekë të njohur me çështjen.

Hetimi i Zyrës së Prokurorit Publik Evropian fokusohet në ndërtimin e dy qendrave të pritjes dhe akomodimit të migrantëve gjatë viteve 2020–2021, në periudhën e pandemisë Covid-19.

Sipas raportimeve, kontratat për këto projekte iu dhanë kompanive private pa procedura tenderimi publik dhe kostot e tyre rezultuan shumë më të larta se projektet e ngjashme, duke arritur në rreth 11.3 milionë euro.

Gazeta Kathimerini raportoi se kampet nën hetim ndodhen në Malakasa, në veri të Athinës, dhe në Sintiki, në rajonin e Serres.

Greqia ishte një nga pikat kryesore të mbërritjes së migrantëve gjatë krizës së emigracionit në Evropë në vitin 2015. Deri në vitin 2019, ndërtimi i kampeve menaxhohej nga Organizata Ndërkombëtare për Migracionin, ndërsa më pas përgjegjësia kaloi te autoritetet greke.