Prokuroria Speciale pushon hetimet ndaj Faton Pecit dhe Fitore Pacollit për dyshimet lidhur me grantet

Kryetari i Mitrovicës, Faton Peci, ka bërë të ditur se Prokuroria Speciale ka nxjerrë aktvendim për pushimin e hetimit penal ku ai dhe deputetja e Lëvizjes Vetëvendosje, Fitore Pacolli, figuronin si të pandehur, siç njofton Kujdestari.info. Peci e ka publikuar vetë dokumentin e Prokurorisë, të datës 26 tetor 2026.

Sipas dokumentit të publikuar, dyshimet lidheshin me veprat penale “Keqpërdorimi i pozitës apo autoritetit zyrtar” dhe “Ushtrimi i ndikimit”, për kohën kur Peci drejtonte Ministrinë e Bujqësisë, Pylltarisë dhe Zhvillimit Rural.

“Prokuroria paska folur qartë, sepse nuk kishte arsye e dëshmi për të folur ndryshe e për të mos mbyllur insinuatat e sulmet e orkestruara kundër punës sime të ndershme”, ka shkruar Peci, duke pretenduar se grantet gjatë mandatit të tij janë ndarë mbi bazën e meritokracisë.

Ai ka paralajmëruar kallëzim penal për deklarim të rrejshëm ndaj zyrtarëve të Lidhjes Demokratike të Kosovës që e ngritën kallëzimin penal, “por edhe të gjithë ata që hodhën gurin e fshehën dorën”, siç ka deklaruar vetë ai.

Rasti lidhet me kallëzimin penal të paraqitur nga LDK-ja në nëntor të vitit 2024, për dyshimet rreth përfitimit të granteve nga familjarë të deputetes Pacolli gjatë kohës kur Peci ishte ministër i Bujqësisë. Të dy i kishin mohuar akuzat, ndërsa Peci ishte intervistuar nga Prokuroria Speciale në cilësinë e të pandehurit në janar të vitit 2026.

Në pjesën e publikuar të dokumentit nuk shihet arsyetimi i plotë i prokurorit, prandaj pretendimi se vendimi dëshmon ndarjen e granteve vetëm mbi bazën e meritokracisë mbetet interpretim i vetë Pecit.