Prokuroritë formojnë lëndë ndaj Knezeviqit dhe Vraneshit për lavdërimin e Mlladiqit

Prokuroria e Lartë në Podgoricë ka formuar lëndë lidhur me deklaratat me të cilat lideri i Partisë Popullore Demokratike (DNP), Milan Knezeviq, ka lavdëruar kriminelin e dënuar përfundimisht të luftës Ratko Mlladiq, siç njofton Televizioni Vijesti, duke iu referuar burimeve jozyrtare.

Knezeviq u mor në pyetje nga policia javën e kaluar, por nuk është tërhequr nga qëndrimet e tij. Edhe të martën, në Kuvend, gjatë debatit për shkarkimin e kryetarit Andrija Mandiq, ai e quajti sërish Mlladiqin hero, ndërsa pas vdekjes së Mlladiqit kishte deklaruar se çdo shtëpi serbe ka nga një Ratko.

Lëndë ka formuar edhe Prokuroria e Lartë në Bijelo Polje ndaj kryetarit të komunës së Pljevljës, Dario Vranesh, dhe procedura ndodhet në fazën e hetimit paraprak. Vranesh më 8 tetor i përsëriti policisë se e konsideron Mlladiqin hero serb dhe se për të ishte nder që kishte botuar nekrologjinë dhe kishte marrë pjesë në varrimin e tij.

Knezeviq në gjithçka sheh sfond politik. Sipas tij, prokuroria po bëhet degë e katërt e pushtetit dhe kërkon të ndikojë në proceset politike, ndërsa ka deklaruar se nuk do t’i referohet imunitetit të deputetit dhe se u vu në shënjestër sepse nuk mbështeti shkarkimin e Mandiqit.

Prokuroria e Podgoricës kishte formuar më herët lëndë edhe ndaj mitropolitit të Budimljes dhe Nikshiqit, Metodije, për lavdërimin e Mlladiqit. Ndërkohë, ende nuk dihet epilogu i kallëzimit penal të disa organizatave joqeveritare ndaj kryetarit të Kuvendit, Andrija Mandiq, për telegramin e tij të ngushëllimit.