Pronari i Milanit, apel tifozëve: Jam i zemëruar si ju, por skuadra duhet mbështetur

Gerry Cardinale u bëri thirrje tifozëve të Milanit të qëndrojnë pranë skuadrës në këtë moment të vështirë, mes protestave të vazhdueshme ndaj klubit dhe drejtuesve. Në intervistën për “Gazzetta dello Sport”, pronari kuqezi theksoi se objektivi mbetet fitorja: “Të fitojmë është prioriteti dhe mund t’ju siguroj se të gjithë duan të fitojnë”.

Cardinale pranoi zhgënjimin e tifozëve, por kërkoi mbështetje: “Vij nga një kulturë ku, kur dikush rrëzohet, ne e ndihmojmë të ngrihet dhe nuk përpiqemi ta shkatërrojmë. Tani skuadra po kalon një moment të vështirë dhe do të doja që të gjithë ata që e duan Milanin ta mbështesin, jo ta demoralizojnë. Janë edhe dy ndeshje për t’u fituar”.

Ai shtoi se e kupton zemërimin e tifozëve: “Nuk i fajësoj tifozët që janë të zemëruar, sepse edhe unë jam i zemëruar. Ata janë po aq të apasionuar sa unë”. Në fund, Cardinale foli për përgjegjësinë personale ndaj situatës: “Kur nuk jemi në nivelin e duhur dhe shoh reagimin e tifozëve, e marr shumë personale. Ndjej një detyrim të madh për t’i rregulluar gjërat sa më shpejt”.