Protesta e studentëve, policia jep njoftimin: 55 të arrestuar, 51 efektivë të plagosur dhe 98 të proceduar

Policia ka arrestuar 55 persona, mes tyre edhe dy të mitur, pas akteve të dhunës gjatë protestës së 14 tetorit para Ministrisë së Arsimit dhe në disa zona të kryeqytetit. 98 shtetas të tjerë janë proceduar penalisht, ndërsa 51 punonjës policie kanë mbetur të dëmtuar.

Protesta e 14 tetorit në Tiranë është shoqëruar me përplasje të forta mes protestuesve dhe Policisë, dëmtime të institucioneve shtetërore dhe bizneseve private, si dhe shkatërrimin e disa pajisjeve dhe automjeteve.

Në njoftimin zyrtar, Policia bën me dije se ka arrestuar në flagrancë 55 shtetas dhe ka proceduar penalisht 98 të tjerë, pas veprimeve hetimore të kryera nën drejtimin e Prokurorisë së Tiranës.

Sipas Policisë, gjatë tubimit para Ministrisë së Arsimit, në rrugën e Durrësit dhe më pas në akse të tjera të kryeqytetit, grupe protestuesish të maskuar kanë hedhur gurë, pllaka guri, sende metalike, kapsolla dhe kokteje molotovi në drejtim të efektivëve, institucioneve dhe subjekteve private.

Si pasojë e përplasjeve, janë dëmtuar kangjellat, muret dhe dritaret e godinës së Ministrisë së Arsimit, si dhe fasada xhami, bankomate, kamera, semaforë, tabela reklamash dhe sinjalistika rrugore. Dëmtime janë raportuar edhe në banka, institucione financiare dhe biznese të ndryshme.

Situata është përshkallëzuar edhe në zona të tjera të Tiranës, përfshirë bulevardet “Dëshmorët e Kombit” dhe “Gjergj Fishta”, rrugën “Muhamet Gjollesha” dhe rrugën e Durrësit.

Sipas Policisë, disa protestues kanë hyrë në rrethimin e Komisariatit të Policisë Nr. 2, ku kanë goditur godinën me sende të forta dhe lëndë piroteknike, duke dëmtuar xhamat dhe portën hyrëse. Gjithashtu, një automjet policie është djegur me lëndë djegëse, ndërsa tre automjete të parkuara janë dëmtuar.

Në kuadër të hetimeve, Policia ka arrestuar 55 persona, mes tyre dy të mitur, përkatësisht 15 dhe 17 vjeç. Ndërkohë, 98 shtetas të tjerë janë proceduar penalisht.

Grupi hetimor, në bashkëpunim me Prokurorinë, vijon punën për identifikimin e personave të tjerë të dyshuar për përfshirje në akte dhune dhe për dokumentimin e plotë të ngjarjeve të regjistruara gjatë protestës.

Materialet procedurale i janë referuar Prokurorisë së Tiranës për veprime të mëtejshme.