Protesta përpara Kryeministrisë, Mërtiri: Goditje më e fortë për Berishën se për Ramën

Ushtria e “patronazhistëve” të Berishës është angazhuar maksimalisht në rrjetet sociale për të zhbërë efektin e protestës qytetare që prej tri ditësh po zhvillohet përpara Kryeministrisë. Më shumë sesa vetë kryeministri Edi Rama dhe qeveria e tij, janë njerëzit e Berishës ata që kanë interes që kjo protestë të shuhet.

Në fakt, protesta po e dëmton politikisht më shumë Berishën sesa Ramën.Kjo sepse ajo ka konfirmuar se në Shqipëri ekziston një zë kundër qeverisjes, por ky zë nuk buron nga oborri e as poshtë ballkonit të Berishës. Është zëri i qytetarëve të lirë.

“Protestat e ditëve të fundit kanë konfirmuar pa asnjë mëdyshje se Berisha nuk e ka legjitimitetin për të përfaqësuar protestën e shqiptarëve kundër qeverisë”, thotë për TemA analisti Ergys Mërtiri. Sipas tij, protesta dëshmoi se në vend ekziston revoltë e vërtetë popullore, por se ajo është penguar prej vitesh pikërisht nga Berisha.

Mërtiri shkon më tej, duke argumentuar se Berisha ndodhet në një marrëdhënie tashmë të hapur bashkëjetese politike me Ramën dhe se nuk përfaqëson interesat e demokratëve apo të qytetarëve shqiptarë pavarësisht bindjeve politike. Ai thekson se dalja e hapur e Berishës kundër protestës është garancia më e fortë që Rama t’i mbijetojë kësaj vale reagimi qytetar.

Në të njëjtën kohë, sheshi përpara Kryeministrisë, i mbushur me të rinj, familjarë me fëmijë dhe qytetarë të çdo moshe, po jep një mesazh të qartë: opozita tradicionale është delegjitimuar në sytë e publikut. Kjo sepse protesta nuk i drejtohet vetëm Ramës. Ajo ka në shënjestër edhe Berishën.

Thirrja që dëgjohet vazhdimisht nga protestuesit: “Rama në burg, Berisha në burg”, është treguesi më i qartë i refuzimit të të dy poleve të politikës së vjetër. Gjatë tri ditëve të protestës, Berisha nuk ka bërë asnjë përpjekje për t’iu qasur sheshit. As njerëzit e tij nuk janë parë pranë protestuesve. Dhe kjo nuk është rastësi. Revolta qytetare u drejtohet pikërisht atyre që, sipas Mertirit, kanë mbajtur peng për vite me radhë reagimin dhe përfaqësimin qytetar në Shqipëri./TemA